Ligjvënësit demokratë në Shtetet e Bashkuara të Amerikës kanë nisur hapin tjetër për shkarkimin e presidentit amerikan, Donald Trump.
Tani ata janë duke e shkruar një raport mbi gjetjet e tyre, por prapë mund të nevojiten më shumë dëshmi dhe seanca dëgjimore, ka thënë Adam Schiff – kryetar i Komitetit të Inteligjencës së Dhomës së Përfaqësuesve, shkruan Reuters.
Schiff, komiteti i të cilit po e udhëheq hetimin që mund të jetë i rrezikshëm për presidencën Trump, ka thënë se paneli ka nisur që ta përpilojë raportin pas dy javësh me seanca dëgjimore dhe dëshmi nga zyrtarë dhe ish-zyrtarë amerikanë.
Ky raport është një hap i rëndësishëm drejt një votimi të mundshëm për shkarkimin e Trumpit në Dhomën e Përfaqësuesve të dominuar nga demokratët.
Nëse raporti në fjalë miratohet, atëherë Senati Amerikan i dominuar nga republikanët do ta gjykojë nëse Trump duhet të shkarkohet nga pozita e presidentit.
Deri më tani, republikanët nuk kanë treguar shumë vullnet për shkarkimin e Trumpit i cili po synon të kandidojë për pozitën e presidentit edhe në vitin 2020.
