Qëndrimi më i shtrenjtë i Trumpit në Davos, 3.4 milionë dollarë - Bota Sot
Qëndrimi më i shtrenjtë i Trumpit në Davos, 3.4 milionë dollarë

Amerika

Qëndrimi më i shtrenjtë i Trumpit në Davos, 3.4 milionë dollarë

Më: 21 janar 2020 Në ora: 13:42
Donald Trump

Udhëtimi dyditor i presidentit të SHBA-së Donald Trump në Forumin Ekonomik Botëror do t’i kushtojë taksapaguesve amerikanë 3.4 milionë dollarë, qëndrimi i tij më i shtrenjtë deri më tani në Davos, shkruan Quartz.

Këto fonde janë të destinuara për qira të makinave dhe pagesa në dhoma hoteli, por nuk përfshijnë kostot e sigurisë, pagat, ose rreth 2.2 milionë dollarë që vlerësohet të jenë të nevojshme për fluturimin presidencial të Air Force 1 nga Cyrihu dhe helikopteri Marin 1 Cyrih-Davos.

Quartz thekson se ky është udhëtimi më i shtrenjtë i Trump deri më tani në Davos.

Udhëtimi i vitit të kaluar, i anuluar nga Trump në minutën e fundit në mes të një mbyllje të pjesshme të qeverisë, pritej të arrinte një kosto prej 3.6 milionë dollarë, por prapëseprapë kushtoi rreth 3.2 milionë dollarë në koston e dhomave të hoteleve të papërdorura dhe makinave me qira.

SHBA kanë ndarë 1 milion dollarë për ekipin e presidentit në Forumin Ekonomik Botëror të këtij viti, transmeton KosovaPress.

Shërbimi Sekret ka ndarë mbi 400.000 dollarë për agjentët që qëndrojnë në Bad Ragaz, një vendpushim me pesë yje dhe 176.000 dollarë të tjerë për dhomat e hoteleve në aeroportin e Cyrihut.

Marrja me qira e një makine për Agjencinë e Komunikimit të Shtëpisë së Bardhë, e cila siguron komunikime të sigurta për presidentin dhe stafin e tij, do të kushtojë rreth 266.000 dollarë.

Çdo janar, mijëra zyrtarë botërorë vijnë në Davos, një qytet zviceran me një popullsi prej rreth 11.000 banorë.

Kërkesa e lartë për akomodim ka rritur çmimet, kështu që një apartament i thjeshtë kushton nga 1.000 dollarë për një natë.

Presidenti i vetëm amerikan që u paraqit në Davos para Trump ishte Bill Clinton, në vitin 2000.

Ronald Reagan bëri disa fjalime përmes video, ndërsa George Bush, George W. Bush dhe Barack Obama e injoruan plotësisht forumin.

Shfaq komentet
comments powered by Disqus
Sot mund të lexoni Shfletoni kopertinat