Presidenti Trump kërcënoi të mërkurën se do të marrë masa për rregullimin ose mbylljen e kompanive të caktuara të mediave sociale.
Kërcënimi vjen një ditë pasi kompania Twitter Inc për herë të parë u shtoi një paralajmërim disa prej tweet-eve të Presidentit, duke i shtyrë lexuesit të kontrollonin me fakte disa nga pohimet e tij.
Të martën, kur ata që shikonin tweet-et e Presidentit Trump klikonin në paralajmërimin e vendosur nga Twitter-i, rrjeti social i drejtonte ata tek një njoftim i titulluar: Trump bën pretendimin e pabazuar se fletëvotimet me postë do të çojnë në mashtrim zgjedhor.
Paralajmërimi përmbante një link që të çonte tek shkrime të rrjetit CNN dhe gazetës Washington Post, si dhe përfshinte një shënim me titull “Çfarë duhet të dini”, si më poshtë:
"Çfarë duhet të dini:
- Trump pretendon në mënyrë të gabuar se fletëvotimet me postë do të çonin në "zgjedhje të falsifikuara". Por, kontrolluesit e fakteve thonë se nuk ka asnjë provë që fletëvotimet me postë kanë lidhje me mashtrim zgjedhor.
- Trump pohon në mënyrë të rreme se Kalifornia do të dërgojë fletëvotimi me postë për "këdo që jeton në këtë shtet, pavarësisht se cili është ose si ka ardhur aty.” Në fakt, vetëm votuesit e regjistruar do të marrin fletëvotime.
- Megjithëse Trump kishte në shënjestër Kaliforninë, fletëvotimet me postë tashmë përdoren në disa shtete, si Oregoni, Juta dhe Nebraska."
Presidenti kishte thënë përmes një postimi se votat e dërguara me postë do të bëheshin shkak për “manipulime të konsiderueshme” duke sjellë zgjedhje të manipuluara.
Sot në mëngjes Presidenti shkroi në Twitter se "Republikanët ndiejnë se platformat e mediave sociale i lënë në heshtje të plotë zërat konservatore. Ne do t'i rregullojmë ato fuqishëm, ose do t'i mbyllim para se të lejojmë që kjo të ndodhë".
PARALAJMËRIMI I TWITTER INC
Të martën kompania Twitter për herë të parë paralajmëroi përdoruesit të kontrollonin faktet në postimet që vë Presidenti Trump në Twitter. Kompania paralajmëronte se pretendimet e presidentit për dërgimin e votave me postë ishin të pavërteta dhe të kundërshtuara nga faktet.
Një pikëçuditëse ngjyrë blu nxit përdoruesit të “kontrollojnë faktet për votat”.
"Presidenti Trump ngre pretendime të pabaza se fletëvotimet e dërguara me postë do të çojnë në falsifikime votash” shkruante një faqe pasuar me shpjegime për ato që i cilësonte si pretendime fallso.
Presidenti kishte thënë përmes postimit në Twitter se votat e dërguara me postë do të sillnin “manipulime të konsiderueshme” duke sjellë zgjedhje të manipuluara. Ai veçonte guvernatorin e Kalifornisë lidhur me këtë temë, megjithëse ky nuk është shteti i vetëm që lejon votimin me postë.
"Unë, si President, nuk do të lejoj që kjo të ndodhë," shkruante ai.
Kalifornia po planifikon t'i dërgojë çdo votuesi të regjistruar një fletëvotim me postë për zgjedhjet e 3 nëntorit. Ky plan bëri që Komiteti Kombëtar Republikan të padisë guvernatorin e Kalifornisë, Gavin Newsom.
Sekretari i shtetit i Kalifornisë Alex Padilla tha se veprimi i ndërmarrë nga Twitter-i për t’u shtuar shenjën e paralajmërimit tweet-eve të Presidentit Trump "është një hap i vogël në drejtimin e duhur. Por ne të gjithë mund të bëjmë pjesën tonë për të ekspozuar gënjeshtrat." "Presidenti, - tha ai, - po përhap me qëllim informacione të rreme për votimin me postë, duke u përpjekur haptazi të shtypë votën."
Twitter pohoi se kjo ishte hera e parë që vendoste një paralajmërim lidhur me një postim të presidentit, që lidhet me politikën e re të kësaj kompanie të vënë në funksionim në fillim të muajit për të luftuar dizinformimin.
AUTORITETI I PRESIDENTIT
Nuk është e qartë nëse Presidenti Trump ka autoritetin për të mbyllur kompani të medias sociale.
I pyetur se çfarë veprimi do të ndërmerrte Presidenti Trump kundër kompanive të mediave sociale si Twitter, këshilltarja e Shtëpisë së Bardhë Kellyanne Conway u tha gazetarëve të mërkurën: "Do të shohim se si do të shkojnë gjërat".
Ligjvënës republikanë dhe demokratë, së bashku me Departamentin e Drejtësisë janë duke shqyrtuar disa ndryshime të propozuara në pjesën 230 të Aktit për Komunikimin e Qytetëruar, një ligj federal i cili përgjithësisht i përjashton platformat e internetit nga përgjegjësia ligjore për materialet që postojnë përdoruesit.
Ndryshime të tilla mund t'i ekspozojnë kompanitë e teknologjisë ndaj padive të reja ose të rrisin ndjeshëm shpenzimet e tyre.
Shtëpia e Bardhë po mendon të krijojë një komision që do të shqyrtonte ankesat për paragjykime antikonservatore në mediat sociale, sipas disa njoftimeve të fundit.
Hapi dramatik i ndërmarrë nga Twitteri të martën bëri që Presidenti Trump ta akuzojë rrjetin social për ndërhyrje në zgjedhjet presidenciale të nëntorit. Ndërkaq, rivali i Twitter-it, Facebook, e la të pandryshuar postimin e Presidentit Trump për fletëvotimet me postë elektronike./Voa/
