Presidenti i Shteteve të Bashkuara, Donald Trump, ka postuar të mërkurën në Twitter video anti-myslimane, të cilat fillimisht janë postuar nga udhëheqësja e një partie britanike e ekstremit të djathtë.
Si kandidat për president, Trump ka bërë thirrje për ndalimin e myslimanëve në SHBA; si president, ai ka lëshuar urdhra ekzekutivë për t’iu ndaluar hyrjen në SHBA qytetarëve të disa vendeve me shumicë myslimane.
Jayda Fransen, udhëheqëse e grupit anti-migrant Britania e Para, i ka postuar videot të mërkurën, duke thënë se ato tregojnë një grup njerëzish myslimanë, duke rrahur një adoleshent deri në vdekje, duke goditur një djalë me paterica dhe duke shkatërruar një statujë të krishterë, raporton Reuters.
Megjithatë, kjo agjenci thotë se nuk ka mundur t’i konfirmojë videot.
