Lava e vullkanit Kilauea në Havai shkatërroi qindra shtëpi gjatë natës, përfshirë dhe shtëpinë e kryetarit të bashkisë Harry Kim.
Banorëve u ishte thënë të evakuoheshin disa javë më parë dhe nuk ka njoftime për viktima.
Numri i pronave të dëmtuara vazhdon të rritet që kur lava filloi të rrjedhë në një zonë kryesisht rurale të ishullit të madh prej muajit të kaluar.
Zyrtarët po i paralajmërojnë banorët për rreziqet e smogut vullkanik që mund të dëmtojë sytë dhe mushkëritë.
Shkencëtarët thonë se lava nga shpërthimi i vullkanit Kilauea ka mbuluar një sipërfaqe prej 20 kilometrash katrorë.
