Kriza e Venezuelës, Maduro kërkon heqjen e subvencionimit për karburantet - Bota Sot
Kriza e Venezuelës, Maduro kërkon heqjen e subvencionimit për karburantet

Amerika

Kriza e Venezuelës, Maduro kërkon heqjen e subvencionimit për karburantet

Më: 14 gusht 2018 Në ora: 10:49
Presidenti i Venezuelës, Nicolas Maduro

Presidenti i Venezuelës, Nicolas Maduro ka paralajmëruar rritjen e çmimit të karburanteve të subvencionuara, me qëllim që të frenojë kontrabandistët që i shkaktojnë vendit miliona dollarë dëme.

“Benzina duhet të shitet në nivelin e çmimeve ndërkombëtare për të ndalur kontrabandimin e saj në Kolumbi dhe Karaibe”, tha Maduro në një fjalim të transmetuar në televizionin shtetëror.

Ashtu si shumë kombe të tjera prodhuese të naftës, Venezuela u ofron shtetasve të saj një çmim tejet të subvencionuar. Por, kontrabandistët përfitojnë nga kjo situatë, duke e rishitur karburantin në vendet fqinje e duke i futur në xhepat e tyre të ardhurat shtesë.

Ekonomia e Venezuelës është në pikiatë të thellë, me normat e inflacionit që përllogariten të kapin një milion për qind këtë vit, megjithatë, çmimi i naftës nuk ka pësuar aspak ndryshim.

Mediet lokale raportojnë se një filxhan kafeje kushton rreth 2.2 milion bolivarë (apo 0.5 dollarë në tregun e zi). Për të njëjtin çmim, kushdo mund ta mbushë një automjet personal tip SUV me karburant rreth 9.000 herë. Lëvizja për të kufizuar subvencionimin e karburanteve është pjesë e një plani të gjerë për të rritur të ardhurat qeveritare.

Maduro tha se “subvencionet e drejtpërdrejta” do t’u ofrohen sërish shtetasve me karta identiteti venezueliane, nëse ata i regjistrojnë automjetet e tyre në censusin qeveritar, por nuk e bëri të qartë sesi do të funksionojë kjo skemë.

Shumë venezuelianë, gjithsesi kundërshtojnë refuzimin e qeverisë së Maduros për të përdorur kartat e identitetit.

Edhe pse Venezuela është e pasur me naftë, teksa konsiderohet si vendi me rezervat më të mëdha natyrore të saj në botë, është pikërisht kjo pasuri që qëndron në rrënjët e shumë prej problemeve ekonomike të saj.

Të ardhurat nga nafta përllogariten sa 95 për qind i të hollave të siguruara nga eksportet në Venezuelë. Kjo nënkupton se, kur çmimet e naftës ishin më të larta, shumë parà përfundonin në arkat e qeverisë venezueliane.

Gjatë kohës së ish-presidentit socialist Hugo Chavez, në pushtet nga shkurti i 1999-s deri në vdekjen e tij në mars 2013, ai shfrytëzonte një pjesë të këtyre parave për të financuar programe sociale tejet bujare për të reduktuar pabarazinë dhe varfërinë.

Por, kur çmimi i naftës ra ndjeshëm në vitin 2014, qeveria u përball papritur me një “vrimë të madhe” në financat e saj, e për këtë arsye ka shkurtuar disa prej programeve më popullore të saj.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...