Paul Manafort, ish-udhëheqës i fushatës së presidentit amerikan, Donald Trump, ra dakord të bashkëpunojë me një hetim për ndërhyrjen e supozuar të Rusisë në zgjedhjet në SHBA, më 2016, pasi e pranoi fajin e tij.
Manafort u deklarua të premten fajtor për dy akuza penale, të ngritura nga zyra e këshilltarit të posaçëm, Robert Mueller, i cili po heton ndërhyrjen e dyshuar ruse.
Sipas dokumenteve të Gjykatës së Qarkut në Uashington, Manafort e pranoi fajin për akuzën për konspiracion kundër SHBA-së dhe akuzën për konspiracion për të penguar drejtësinë.
Marrëveshja shmang një gjyq të dytë për pastrimin e parave dhe akuza të tjera.
Manafort, muajin e kaluar, u dënua në tetë akuza për mashtrim, mashtrim bankar dhe moszbulim të llogarive bankare.
Shtëpia e Bardhë tha se pranimi i fajit nuk ka të bëjë fare me presidentin Donald Trump.
