15 vjet nga ikja nga kjo botë, e Anita Bitrit - Bota Sot
15 vjet nga ikja nga kjo botë, e Anita Bitrit

Amerika

15 vjet nga ikja nga kjo botë, e Anita Bitrit

Nga: Beqir Sina Më: 20 tetor 2019 Në ora: 15:53
Anita Bitrit

19 tetor 2004 - Anita Bitri, ikja e këngëtares shqiptare, që iku si engjëll së bashku me nënën Hazbie dhe vajzën 7-vjeçe, Sibora

STATEN ISLAND NY, – Anita Bitri u lind në Sarandë, më 8 Janar 1968 në një familje intelektuale. Të gjithë admironin tiparet e bukura dhe të ëmbla të kësaj fëmije engjëllor. Edhe pse ishte në kopsht, ajo këndonte dhe recitonte pa pushim. Që në atë moshë dinte shumë poezi të njohura dhe imitonte shumë këngë të festivaleve. Vlen për të përmendur pjesëmarrja e saj në Festivalin e Fatosave të rrethit të Vlorës, ku paraqitet si valltare në rolin e “bletës punëtore”. Interpretimi i talentuar i Anitës, tërhoqi vëmendjen e pjesëtarëve të jurisë, të cilët e vlerësuan si kërcimtaren dhe këngëtaren më të mirë të këtij Festivali.

8–14 vjeç, Anita ishte pjesëmarrëse e rregullt e Festivaleve të Pionierëve të rrethit të Vlorës

Prej moshës 8–14 vjeç, Anita, ishte pjesëmarrëse e rregullt e Festivaleve të Pionierëve të rrethit të Vlorës, duke u vlerësuar edhe me çmime nderi. Për t’u përmendur janë këngët e kënduara prej saj “Kukulla ime”, ”Agimi dhe fshesa” etj…. Ishte një fëmijë ëndërrimtar dhe shumë e apasionuar pas muzikës dhe këngës. Këngëtarja Vaçe Zela ishte idhulli i saj dhe ëndërronte të bëhej si ajo, një këngëtare e famshme.

Talenti i saj i veçantë për muzikën tërhoqi vëmendjen e profesorit të violinës, Robert Papavrami, i cili u mahnit nga veshi muzikor i kësaj fëmije në konkursin që u zhvillua për pranimin e elementëve të rinj për klasën e parë të shkollës së muzikës “Naim Frashëri” në Vlorë. Për të parën herë profesori i madh u ndesh me një talent të tillë të dhuruar nga natyra. Anita, sipas profesorit, ishte një nga rastet e rralla që kishte 99 % talent të dhuruar nga Zoti dhe i duhej vetëm 1 % punë për t’u bërë gjeni në violinë. Intuita e profesorit nuk gaboi; Do të duhej vetëm një vit pune që Robert Papavrami dhe Anita të dilnin para spektatorit vlonjat në një duet me violinë, duke mahnitur sallën me interpretimin e tyre virtuoz.

Vitet e shkollës fillore dhe 8-vjeçare u karakterizuan nga një pjekuri e lartë artistike në drejtim të violinës, por Anita ishte edhe një nxënëse e mirë edhe në disiplinat e tjera. Kishte një pasion të veçantë për sportin, veçanërisht i pëlqenin ushtrimet gjimnastikore dhe lojërat e topit me dorë (basketboll dhe volejboll) dhe në këtë fushë shfaqej si një sportiste e lindur.

Në vitet e shkollës së mesme Anita, filloj të studionte fshehurazi dhe të besonte në ekzistencën e Zotit dhe t’i bindej verbërisht Atij, thuhet në memoarët e saj për të cilat përkujdeset vëllai i saj Arben Bitri i cili përditëson dhe e mirëmban faqen : “www.anitabitri.com”.

“Të gjithë habiteshin me bindjet e saj fetare, të ndaluara për atë kohë. Pa asnjë druajtje shprehej që dhuntitë e saj ishin dhuratë e Zotit dhe çdo gjë e shikonte në këndvështrimin e tij. Në shkollën e mesme të muzikës “Naim Frashëri” në Vlorë ku ajo vazhdoi studimet, karakterizohej si një nxënëse shembullore, veçanërisht në violinë, që ishte edhe instrumenti për të cilën studionte. Pasioni i fëmijërisë, kënga, ia kishte lënë vëndin violinës dhe solfexhit” ka thënë vëllai saj Arbeni.

Prezantimi i Anitës si këngëtare ishte thjesht një rastësi

Në vitet 1980-1986, ajo prezantohet para publikut vlonjat si violiniste në orkestrinën e shkollës së muzikës “Naim Frashëri”, mirëpo duke u rritur pasioni për këngën po e thërriste, gjë të cilën Anita filloi ta demonstronte te shokët e klasës dhe profesorët e kantos. Të gjithë kuptuan se përveçse një violiniste e talentuar, ajo kishte edhe një zë të jashtëzakonshëm.

“Një zë i ëmbël e njëkohësisht i rrallë”, e cilësuan profesorët e saj

Prezantimi i Anitës si këngëtare ishte thjesht një rastësi e përgatitur nga Zoti. Gjatë një koncerti ku ajo merrte pjesë si violiniste, një nga këngëtaret u sëmurë dhe kështu, lindi domosdoshmëria të zëvendësohej. Shokët e orkestrës, që e kishin dëgjuar të këndonte, propozuan atë dhe efekti ishte i mahnitshëm. Prezantimi i parë u prit me duartrokitje pa fund nga publiku i sallës i elektrizuar nga zëri i mahnitshëm i saj. Ky ishte fillimi i një karriere të gjatë dhe të suksesshme artistike, që ka vetëm një protagoniste: Të madhen dhe të paharruarën Anita Bitri.

Kënga e parë e Anitës në shkallë kombëtare titullohet “Hartimi dhe Dëbora”.

Në anketën muzikore të Radio Tiranës, për këtë këngë, vlerësohet për interpretimin e saj brilant. Më pas, sukseset e saj vazhduan me këngën shumë të njohur, “Mos u nxito, mos u gabo” të Alqi Boshnjakut në Koncertin e Pranverës 1988, ku u vlerësua me çmim të parë. Talenti i Anitës nuk mund të mos tërhiqte vëmendjen e kompozitorëve të njohur të asaj kohe. Flamur Shehu ishte i pari që do të besonte tek ajo dhe do të fillonte të bashkëpunonte me të në disa festivale me radhë të Radio Televizionit Shqiptar. Vlen për t’u përmendur interpretimi i këngëve “Lulet e majit i çel në janar”, “S’ka formulë në Dashuri”, “Abrakadabra” etj. Në këto vite triumfi Anita pranohet si këngëtare profesioniste në trupën e Teatrit të Estradës Vlorë. Më pas ajo korr një sukses të jashtëzakonshëm në shkallë kombëtare me koncertet e saj recitale të titulluara “Anita”. Në çdo vit që kalonte, Anita shihej si një rrezik i madh për marrjen e çmimeve, sepse nga kënga në këngë, nga viti në vit, konfirmohej si një këngëtare pa të cilën festivali nuk kishte kuptim. E gjitha kjo nuk u arrit veçse nga talenti i saj i padiskutueshëm, mënyra se si e interpretonte këngën, luku plot shije dhe mbi të gjitha, për faktin se ajo pati guximin të fusë elementët e rinj bashkëkohorë dhe shumë modernë për kohën. Te këngëtarja Anita Bitri gjendet gjithçka që Zoti i ka dhuruar një artisti.

Krahas këngës Anita, nuk la pas dore dhe studimet, ishte vullneti dhe dëshira e saj që bën të mundur vazhdimin e studimeve të shkollës së lartë në Institutin e Lartë Pedagogjik “Aleksandër Xhuvani” në Elbasan, ku në vitin 1989 diplomohet si mësuese kantoje. Profesionin e mësueses e ushtroi vetëm për pak muaj, pasi ajo që e thërriste ishte kënga. Zoti i kishte caktuar një mision, të lumturonte popullin e vet me zërin e saj magjik.

Koncertet recitale “Anita”, që u zhvilluan me një sukses të madh në çdo cep të Atdheut, bën që Anita të fitonte një popullaritet të jashtëzakonshëm në çdo qytet të Shqipërisë. Pas një shfaqjeje të suksesshme në Tropojë, iu bë ftesa për të shkuar në SHBA. Në mars 1996 mbërrin në “tokën e premtuar”.

Gjatë qëndrimit në Amerikë, aktiviteti artistik i Anitës, ka qenë i pandalshëm dhe gjithmonë në rritje. Ajo ka qenë përherë e lidhur me problemet e Diasporës Shqiptare, dhe, ka ndihmuar shumë në rritjen e prestigjit të artit shqiptar.

Mbasi, Anita, ishte jo vetëm një artiste e talentuar, por gjithashtu dhe një patriote e flaktë. Vlen për t’u përmendur pjesëmarrja me koleget e saj, kengetare artiste në koncertet e bamirësisë dhe aktivitete të ndryshme të Diasporës, për mbledhjen e ndihmave për luftën në Kosovë.

Në këtë kontekst është për t’u theksuar edhe koncerti i bamirësisë, që u zhvillua në 10 prill 2000, për mbledhjen e ndihmave për fëmijët e varfër të Shqipërisë. Për këtë koncert Anita meritoj lavdërimet dhe respektin e Presidentit të Shqipërisë, zotit Meidani, athere për kontributin e dhënë dhe gjatë interpretimit të disa këngëve u shoqërua nga vetë gruaja e Presidentit.

Ajo ishte njëkohësisht dhe një anëtare aktive e Organizatës së Gruas Shqiptare në Amerikë “Motrat Qiriazi”. Anita e shikonte pjesëmarrjen në koncertet e ndryshme të komunitetit si dhe ato bamirëse si vazhdimësi të rrugës së saj artistike. Në këtë mënyrë, talentin dhe zërin e mrekullueshëm ja dedikoi tërësisht çështjes shqiptare, duke iu bashkuar kolegeve te saj ne Shtetet e Bashkuara, muzikant dhe kengetar.

I gjithë opinioni amerikan është prekur nga tragjedia “Bitri” e 19 tetorit 2004, bashkë me Aniten vdesin, e ëma Hazbie, dhe, vajza e saj 7-vjeç, Sibora, njekohësisht u gjet i mbytyr nga helmi edhe qeni i shtëpisë, një kotele shumë e dashur

Vdekja e saj ndërsa kujtohet cdo përvjetor, ajo tashmë mbetet vetëm një hidhërim që të këput shpirtin prej kësaj tragjedie familjare. Ku, papritmas Tri jetë u morën nga një vrasës i heshtur, pa erë, pa shije me emrin Monoksidi i Carbonit. Në të martën e zezë, e 19 tetorit 2004, aty rreth orës 8. 30 të mëngjesit, kur zjarrfikësit gjetën në “gjumë” nënën, vajzën dhe mbesën të helmuara nga monoksidi i karbonit.

15 vjet më parë kur njësitë e emergjencës hynë në shtëpinë që ndodhet në bulevardin Ocean Avenue, ata konstatuan se niveli i gazit CO (monoksidit të karbonit) në ajër ishte më i lartë se njëmijë për milion, ndërkohë që niveli normal konsiderohet nga 0 deri 9 për milion. "Me shifra të tilla, mjaftojnë disa frymëmarrje, thithe të ajrit që njeriu të humbë ndjenjat", do të thoshte shefi i zjarrfikësve, Thomas Haring që udhëhoqi aksionin e shpëtimit por që rezultoi fata mbasi tre trupa të pa jetë si në gjumë u gjenden në shtëpi në ishullin e Staten Island – New York.

Viktimat:

Një nga viktimat ishte 38-vjeçarja Anita Bitri, një këngëtare e njohur në vendin e saj, Shqipëri, e cila kërkoi të fitonte famë në SHBA. Bashkë me të, humbën jetën edhe nëna e saj 60-vjeçare, Hazbia dhe vajza Sibora, shtatë vjeç. Familja ishte transferuar në Staten Island rreth dy vjet më parë, se të vdiste për t’u vendosur në këtë rrugë të qetë të seksionit South Beach. Vetëm pak javë më parë, se vdekja të merrte këngëtaren shqiptare, ajo kishte humbur edhe bashkëshortin, i cili kishte vdekur pas një sëmundje të pashërueshme.

Htimet helmimi doli nga kaldaja:

Hetimet e policisë njujorkeze : Shkaku i tragjedisë ka qenë kaldaja e ndodhur në bodrumin e shtëpisë ngjyrë rozë të këngëtares shqiptare. Sipas një zëdhënësi të Departamentit të Ndërtimit, në NYC, Llyse Fink, kohët e fundit ishin kryer disa punime rikonstruksioni në shtëpi dhe si rrjedhojë ishin vendosur disa qese plastike në vrimën e ventilimit të kaldajës. Bllokimi i kaldajës ka bërë që gazi CO (monoksid karboni) i lëshuar nga lënda djegëse që përdoret brenda saj të depërtojë gjatë natës në shtëpi duke i kapur në befasi në gjumë banoret e saj.

"Bllokimi i kaldajës ishte një aksident, që solli është këtë tragjedi", ka deklaruar zëdhënësi Fink.

Sipas autoriteteve, Monoksidi i Karbonit, krijohet gjithnjë në rastet kur digjet benzinë, naftë, dru, qymyr guri ose druri, ose edhe gaz propan. Shifrat zyrtare tregonin pas kësaj ngjarje tragjike, e cila ngriti shqetësim edhe në Bashkinë e Qytetit të Nju Jorkut, për rreth 300 vetë që vdesin çdo vit në këtë mënyrë në SHBA.

Familja vdiq më pak se dy javë para hyrjes në fuqi të një vendimi bashkiak, që u kërkon të gjitha shtëpive të vendosin detektorë të monoksidit të karbonit në një rreze pesë metra larg nga ambientet e fjetjes. Kjo pajisje funksionon njësoj si detektorët e tymit, duke lëshuar alarm zanor sapo konstatohet prania e gazit.

Mesazhi me të cilin e përcollën kolegen e tyre artistët shqiptarë në Amerikë.

Anita Bitri ishte një zëdhënëse e artit shqiptar, ajo ishte një nga këngëtaret më të spikatura shqiptare me të cilën muzika shqiptare humbi një nga gjeneratorët më të fuqishëm të muzikës së lehtë. Përkujtimi i saj shpreh me këtë rast edhe keqardhjen, edhe hidhërimin e thellë për këtë humbje të madhe, tragjike e më se tragjike dhe aq më shumë ishte një humbje familjare. Kjo dhimbje medoemos që do të vazhdojë gjatë dhe do të mbetet në zemrat tona, ndërkaq duke kujtuar Anitën ne i bëjmë një nder të madh jo vetëm të ndjerës, por edhe vetvetes duke pasur parasysh atë moton tonë që është:”Të kthejmë gjithmonë kokën andej nga kemi ardhur” se i përkasim atij kombi dhe asaj kulture. Duke nderuar këtë këngëtare kemi edhe një të drejtë morale para pasardhësve tanë, që edhe ata të shkojnë në vazhdimësi. Dhe ky është misioni i pavdekshmërisë sonë misioni i artit shqiptar kudo dhe në çdo vend. Ky mision është që veprat të mos i lëmë ti mbulojë tisi i harresës, pasi artisti ka detyrën e altarit tempullor dhe misioni i tij është që të bukurën ta përcjell në popullin e tij.

Dhe në emër të së bukurës le të dëgjojmë muzikën e kënduar nga këngëtarja Anita Bitri – e bukura është vetë muzika që ajo krijojë.

Shfaq komentet
comments powered by Disqus
Sot mund të lexoni Shfletoni kopertinat