Shkolla shqipe “Kongresi i Manastirit“ mbushi rreth 50 vjet dhe sot gëzon një numrër rekord të nxënësve.
Prej vitit 1972, në Chicago të SHBA-së është themeluar shkolla shqipe “Kongresi i Manastirit“. Çdo të diel, edhe sot pas thuajse 50 vjetësh, rreth 170 nxënës nga trevat e ndryshme shqiptare vijojnë mësimin e gjuhës amtare aty.
Në një reportazh tregohet ecuria e punës së kësaj shkolle, qëllim i së cilës është ruajtja e gjuhës shqipe dhe identiteti kombëtar për brezat e rinj që jetojnë atje.
Duke qenë se gjenden më shumë se tetë mijë kilometra larg vendlindjes, shqiptarët e Çikagos me fanatizëm po e ruajnë dhe po e kultivojnë identitetin kombëtar. Kontribut të pamohueshëm në këtë drejtim po jep shkolla shqipe “Kongresi i Manastirit”.
Po ashtu, qendra funksionon gati 50 vjet, kurse interesimi i nxënësve vazhdon e rritet dhe tani ka arritur në njëqind e shtatëdhjetë, thotë për Lajm.Tv drejtoresha e kësaj qendre, Qëndresa Braimi, e cila në punën e saj ka mbështetje të parezervë nga zëvendësja Laura Aliu, si dhe nga koordinatoret Shega Bekteshi, Benka Rizmani dhe Luljeta Bajraktari.
Ajo që gëzon jashtë mase dhe që jep shpresë se identiteti shqiptar do të ruhet gjeneratë pas gjenerate në këto pjesë të Shteteve të Bashkuara të Amerikës, është fakti se aktivitetet kombëtare mbështeten nga të gjitha gjeneratat. Me të njëjtin elan angazhohen edhe gjeneratat që kanë migruar para 50 vjetëve, por edhe ato më të reja, që kanë lindur në SHBA.
Ndjenjat dhe identiteti kombëtar tek fëmijët shqiptarë në Çikago kultivohet edhe përmes folklorit, e kjo bëhet në kuadër të grupit të valltarëve.
Aktivitetet e shqiptarëve në Çikago zhvillohen në kuadër të komunitetit shqiptar, në kuadër të cilit funksionojnë dhe kontribuojnë shumë shoqata.
