Pak ditë më parë, gazetari i CNN, Bill Weir zbuloi përmes një postimi në Twitter se një shqiptar nga Kosova kishte gjetur kuletën e aktores Meryl Streep me 2000 dollarë brenda dhe ia kishte kthyer. Madje, ai kishte refuzuar edhe shpërblimin.
Shqiptari quhet Zymer Berisha dhe ka rrëfyer gjithë historinë. Ai tha se Meryl Streep është aktorja e tij e preferuar, megjithatë nuk e ka takuar, pasi për të marrë portofolin kishte shkuar vajza e saj.
“Ishte një mbrëmje e bukur për fatin tim që të kisha në dorë portofolin e Meryl Streep. Unë e pashë në rrugë. M’u duk si paketë e madhe dhe po më dukej sikur po pengonte makinat. Shkova e mora dhe kur pashë që ishte çantë, e hapa ta dija se e kujt ishte. Pashë fotografinë, dokumentet dhe kartat e saj, m’u duk pak si ndryshe në fotografi, por kur e lexova ishte Meryl Steep. U befasova, por nuk hezitova të kontaktoj disa nga numrat e telefonit që ishin aty brenda. U lidha me vajzën e saj, e cila erdhi ta merrte. Vajza e saj jeton aty diku afër”, shpjegoi ai për emisionin “Rudina”.
“I pashë fotografinë dhe letrat dhe pashë shumën e madhe të parave. Sidoqoftë e kam mësuar prej prindërve të mi se çfarëdo, sado vlerë të madhe të ketë, kur s’është e jotja, s’është e jotja. E bija u largua dhe më pas tha “Oh Zot”, sepse kur po largohej i pa dokumentat dhe dollarët. Tha se s’mungonte asnjë cent. I thashë që s’mungon se ka rënë në duar të sigurta. Tentoi të më japë diçka, por unë s’pranova, sepse nuk e bëra që të marr shpërblim, por sepse nuk ishte imja”, -ka treguar Berisha.
Në fund, Zymer Berisha rrëfeu se vajza e Streep u kthye përsëri tek ai dhe i tha se e ëma e kishte dërguar prapë se dëshironte të pranonte diçka të vogël në shenjë falënderimi, që ishte një shumë e vogël parash, të cilën ai si përfundim e pranoi.
