“In excess” titullohet ekspozita e radhës e artistit nga Prishtina me vendqëndrim në Hamburg të Gjermanisë. Mentor A. Ejupi Toro këtë ekspozitë do e hap në galerinë PopArt Store në qendrën tregtare të Edeka nord – Marktkauf-Center Hamburg me 27 mars 2019.
Literatura dhe piktura kanë qenë gjithmonë shtytje për njëra tjetrën, janë bërë shumë shkrime për temat të marra nga pikturat e ndryshme po ashtu janë bërë dhe bëhen akoma shumë piktura të bazuara në ngjarjet e librave nga mjeshtrit e literaturës. Autori i mirënjohur Charles Bukowsky ishte ai i cili shtyu piktorin të merret me ilustrimin apo pikturimin e jetës dhe veprës së autorit autobiografikë.
Pikturat gjigante të formatit si „Charles in New York“ që është 200 x 300 cm e punuar në kanavec të bënë të ndjehesh i vogël si njeri pranë kësaj pune, duke reflektuar një rrëmujë metropolitane, një kaos nga jeta e bujshme e natës por me një kompozicion dhe një perspektiv maestrale, për të dalë në pah „varshmëria“ e Bukowskit ndaj alkoolit dhe epshit erotik por me një abstraksion „konkret“ dallohet dora e zgjatur me një shishe vere në dorë dhe shumë figura femrash që janë të kompozuara me një dinamikë sukseksi – që e bënë të dallohet puna e Toros ndër vite nga artistët tjerë.
Tek puna „ Charles with A.“ kemi një format vertikal 140 x 200 cm i punuar me vaj në kanavec ku përveç portretit të fshehur të Charles Bukowsky kemi një prerje fytyre femre e cila me një epsh shkrihet mbi portretin e fshehur duke dhënë një perspektivë dhe një mashtrim optik të një thellësie të mbyllur në të kaltrën e qiellit. Dekonstruimi i figuratives në këtë abstraksion që përmban shumë simbole erotike të mbanë në një situatë transi meditativ të një momenti nga letrat e Bukowskit drejtuar Henry Millerit.