“Një rrugëtim i vështirë- 20 vjet pas -Të mbijetosh përmes ngjyrash - Bota Sot
“Një rrugëtim i vështirë- 20 vjet pas -Të mbijetosh përmes ngjyrash

Art

“Një rrugëtim i vështirë- 20 vjet pas -Të mbijetosh përmes ngjyrash

Më: 20 prill 2019 Në ora: 18:35
Eksozita

Qendra për Hapje dhe Dialog  hapi ekspozitën “Një rrugëtim i vështirë- 20 vjet pas” e cila realizohet në bashkëpunim me QSHDNJ, ku ekspozohen 100 vizatime dhe vjersha të fëmijëve nga Kosova gjatë eksodit 1998-1999 në Shqipëri. “Mobilizimi i shqiptarëve për të ndihmuar kosovarët e dëbuar dëshmoi vlerat e një kombi të bashkuar. Kjo ekspozitë sot është dëshmi e kujtesës, e fëmijëve që i mbijetuan luftës, falë ndihmës së Qendrës Shqiptare për të Drejtat e Njeriut , e cila organizoi 36 shkolla verore argëtuese, ku mësues dhe ekspertë të edukimit u angazhuan për të rehabilituar fëmijët kosovarë”- u shpreh Eridana Çano, Drejtoresha e Agjencisë për Dialog dhe Bashkëqeverisje.

Dhuna dhe terrori serb detyroi mbi 600 mijë qytetarë nga Kosova të largohen nga trojet e tyre drejt Shqipërisë gjatë periudhës Qershor 1998 – Korrik 1999, e cila arriti pikën kulmore të dëbimeve në datën 16 prill 1999.

Qendra Shqiptare për të Drejtat e Njeriut (QSHDNJ) organizoi 36 shkolla verore argëtuese, ku mësues dhe ekspertë të edukimit u angazhuan për rehabilitimin e fëmijëve  nga Kosova.

Nga ky projekt përfituan rreth 40 mijë refugjatë në Tiranë e Durrës.

Mikpritja dhe ngrohtësia vëllazërore e popullit shqiptar lehtësoi sadopak dhimbjen dhe traumën që ata po përjetonin.

Gjurmët e traumës psikologjike shprehen qartazi  në shumë nga punimet e para të  vogëlushëve, traumë e cila gradualisht u arrit të mposhtej duke u zëvendësuar me vizatime gjithmonë e më optimiste, për një të ardhme në paqe dhe për një rikthim sa më të shpejtë në shtëpitë e tyre në Kosovë. 

 “Kosova na mbledh sot në këtë ekspozitë për të na treguar dëshirën e jetës dhe fuqinë e mbijetesës edhe në eksodin më të rëndë të historisë së saj”- u shpreh Kozara Kati, drejtuese e Qendrës Shqiptare për të Drejtat e Njeriut. 

Ndërsa Feride Rushiti nga Qendra Kosovare për Rehabilitimin e të Mbijetuarve të Torturës theksoi se “Kjo ekspozitë i kontribuon memories kolektive të Kosovës. Nuk mund të ndërtojmë të ardhmen tonë pa kujtuar të shkuarën”.

Emocionuese pjesëmarrja e Merita Durakut në këtë ekspozitë me dy vizatime të krijuara në moshën 14- vjeçare. “Falënderoj të gjithë shqiptarët që na u gjendën pranë në momentet më të vështira të luftës dhe na dhanë shpresën për të jetuar përmes shkollave verore, të ngritura nga QSHDNJ. Ne mbijetuam falë shpresës që na dhatë të gjithë JU”- u shpreh e emocionuar Merita.

Në ditët e eksodit u ndihmuan edhe shumë mësues dhe vullnetarë nga Kosova si Familja Sheremeti në Shkallnur, Familja Duraku nga Krusha e Madhe, Nesip Gashi nga Prizreni, të cilët u falenderuan nga të pranishmit për angazhimin  në shkollat verore dhe kontributin në rehabilitimin e një numri të madh të fëmijëve të traumatizuar.

E vështira  e kësaj ekspozite është rrugëtimi i fëmijëve nga përjetimi i ngjarjeve tragjike të luftës drejt shpresës dhe lirisë.

E përbashkët mbetet ëndrra për një vatër të ngrohtë dhe familjare në Kosovën e lirë.

Shtëpia- është vizatimi që do të shohim të ripërsëritet në çdo ngjyrë të hedhur nga fëmijët në këtë ekspozitë.

20 vjet më pas le t’ju urojmë këtyre Fëmijëve tashmë “Të rritur” një të ardhme të lumtur në trojet e tyre legjitime!

Ekspozita “Një rrugëtim i vështirë- 20 vjet pas” organizohet nga COD dhe QSHDNJ, ku ekspozohen 100 vizatime dhe vjersha të fëmijëve.

Ekspozita do të qëndrojë e hapur në COD  nga data 18 prill-5 maj 2019.

Image
Image
Image
Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...