Kombëtarja e Kosovës synon rezultate të mira në Kampionatin Ballkanik në Kros që mbahet nesër (18 nëntor) në Çanakkale të Turqisë. “Atletët tanë që do të paraqiten në kampionatin Ballkanik në kros janë: Musa Hajdari në kategorinë e seniorëve, në disiplinën 10 kilometra, Luljeta Shala (seniore) në 8 kilometra, Gresa Bakraqi (senioreve të reja U-23) në 6 kilometra, Valentin Sadiku (seniorët e rinj U-23) në 8 kilometra, Çlirim Hyseni (juniorët U-20) në 6 kilometra, ndërsa trajner është Hysni Hoti dhe udhëheqës i kombëtares Shehad Rrudhani”, bëhet e ditur nga Federata Atletike e Kosovës. Kryetari i Federatës, Halil Sylejmani, tha se pret paraqitje dinjitoze të atletëve e atleteve gjatë kësaj gare të rëndësishme.