Protestuesit irakianë e kanë sulmuar konsullatën iraniane në qytetin e shenjtë shiit të Kerbelasë në vargun e protestave kundër korrupsionit, papunësisë. Ata po e kundërshtojnë edhe ndërhyrjen e Iranit në punët e brendshme të Irakut.
Agjencia “Associated Press” ka cituar dëshmitarë që kanë thënë se protestuesit e kanë larguar flamurin iranian nga konsullata dhe e kanë ngritur flamurin irakian në vend të tij.
Në disa pamje amatore të publikuara në internet shihet se si protestuesit hedhin koktej molotovi mbi murin rrethues të konsullatës iraniane.
#BREAKING: Dozens of Iraqi demonstrators have stormed the Iranian consulate in #Karbala, lowering the flag and burning part of the outer wall #IraqProtests https://t.co/axoNKBjwHh pic.twitter.com/4wLEJYImKW
— Arab News (@arabnews) November 3, 2019
Ndaj këtij sulmi nuk ka ende ndonjë reagim zyrtar të autoriteteve iraniane.
Protestat masive në Irak filluan më 1 tetor. Më shumë se 250 njerëz janë vrarë dhe mijëra të tjerë janë plagosur për një muaj gjatë përleshjeve me forcat e sigurisë, të cilat kohë pas kohe kanë përdorur plumba lufte për t’i shpërndarë turmat.
Irani e ka zgjeruar ndikimin e vet në Irak që nga rënia e diktatorit irakian, Saddam Hussein dhe hyrja e forcave amerikane në Irak në vitin 2003.
Kryeministri i Irakut, Adil Abdul Mahdi, ka kërkuar nga protestuesit që t’i ndërpresin tubimet për shkak se kryengritja i ka kushtuar ekonomisë së vendit miliarda dollarë, shkruan “Free Europe”.