Japonezi Hiroaki Suda, 57 vjeç, është arrestuar nga policia në Osaka, pasi akuzohet se ka vjedhur rreth 5.800 ulëse biçikletash.
Suda i cili punonte si shofer kamioni u arrestua më 13 shkurt, pasi një kamerë sigurie e kapi duke vjedhur dy ulëse biçikletash, shkruan Japan Times. Po ashtu, ai u kap nga kamerat më 29 dhe 30 nëntor në një stacion treni dhe një parking për biçikleta në Higashiosaka. Suda ka pranuar akuzat.
"Unë fillova të vidhja ulëset e biçikletave rreth 25 vjet më parë në Tokio dhe Osaka për të lehtësuar stresin në punë dhe gradualisht, mbledhja e tyre doli të ishte argëtuese", ka thënë ai në Gjykatë.
Policia u befasua kur kapi ulëset e biçikletave dhe dyshon se Suda i vodhi ato ndërsa po udhëtonte nga qyteti në qytet si shofer kamioni.
