Të paktën 25 persona kanë vdekur dhe shtatë të tjerë janë plagosur nga zjarri që shpërtheu në një kantier ndërtimi në Korenë Jugore.
Të gjitha viktimat ishin punëtorë ndërtimtarie, të cilët ishin duke e ndërtuar një depo në qytetin Icheon, rreth 80 kilometra në juglindje të Seulit, raporton agjencia “Reuters”.
Një përfaqësues i zjarrfikësve lokalë tha se autoritetet ende janë duke punuar për ta gjetur numrin e saktë të viktimave.
Sipas vlerësimit fillestar, zyrtarët besojnë se zjarri është nisur nga një shpërthim që ka ndodhur në depo përderisa punëtorët ishin duke bërë instalime me materiale të ndezshme në një kat nëntokësor të depos.
Ndërtesa ku u përhap zjarri i kishte dy kate mbi tokë dhe dy të tjera në nivel nëntokësor, me një sipërfaqe prej mbi 11 mijë metrave katrorë.
