Presidenti iranian Masoud Pezeshkian tha se vendi i tij është gati të "ofrojë garanci" dhe të "ndërtojë besim" në lidhje me aktivitetet bërthamore të vendit, raportoi agjencia shtetërore e lajmeve IRNA, pasi Presidenti i Francës Emmanuel Macron shprehu shqetësime në një telefonatë të shtunën.
"Republika Islamike e Iranit është gati për negociata dhe dialog për të zgjidhur çështjet, por çdo bisedë ose parakusht do të pranohet vetëm brenda kornizës së ligjeve dhe normave ndërkombëtare", tha Pezeshkian në një deklaratë të shtunën, shkruan CNN, transmeton "Bota sot".
Pezeshkian shtoi se Teherani "nuk do të pranojë kurrë uljen e aktiviteteve bërthamore në zero", sipas agjencisë gjysmëzyrtare të lajmeve Tasnim të Iranit, dhe paralajmëroi se përgjigja e Iranit "do të jetë edhe më vendimtare dhe e fuqishme" përballë sulmit të Izraelit.
"Që nga fillimi, ne kemi kërkuar të forcojmë bashkëpunimin me të gjitha vendet e botës bazuar në besimin dhe respektin e ndërsjellë. Megjithatë, ishte regjimi sionist që e prishi këtë rrugë që nga dita e parë", tha ai.
Izraeli nisi sulme masive ndaj Iranit më 13 qershor, të cilat sipas tij kishin në shënjestër lokacionet bërthamore dhe oficerët e lartë ushtarakë, duke shkaktuar sulme hakmarrëse nga Teherani. Luftimet njëjavore kanë shkaktuar tashmë një kosto të hidhur njerëzore.
Irani ka ndërtuar infrastrukturën e tij bërthamore që nga vitet 1960, me disa objekte të varrosura nën tokë. Është i aftë për shumicën e fazave të prodhimit të uraniumit, nga minierat deri te pasurimi - dhe prej kohësh ka mbajtur programin paqësor, konkretisht për të gjeneruar energji për përdorim civil.
