Të paktën 30 persona u vranë dhe shumë të tjerë mbetën të plagosur si pasojë e një sulmi vetëvrasës sot në kishën Mar Elias në Damask të Sirisë.
Një foto e publikuar nga media shtetërore siriane SANA tregonte stolat e kishës të mbuluara me mbeturina dhe gjak.
Sipas agjencisë shtetërore siriane të lajmeve, sulmuesi shpërtheu një rrip shpërthyes brenda kishës, e cila thuhet se ishte e mbushur me rreth 400 persona në atë kohë.
Burimet lokale raportojnë se forcat e sigurisë e mbyllën shpejt zonën, evakuuan të plagosurit dhe viktimat, dhe ngritën një kordon sigurie rreth vendit të sulmit. Numri i saktë i viktimave nuk dihet ende.
Ministri sirian i Informacionit Hamza Mostafa e dënoi sulmin, duke e quajtur atë një sulm terrorist.
"Ky akt frikacak shkon kundër vlerave civile që na bashkojnë", shkroi ai në rrjetet sociale X, raporton KosovaPress.
"Ne nuk do të devijojmë nga angazhimi ynë për qytetari të barabartë... ne gjithashtu riafirmojmë premtimin e shtetit për të bërë çdo përpjekje për të luftuar organizatat kriminale dhe për të mbrojtur shoqërinë nga të gjitha sulmet që kërcënojnë sigurinë e saj", shtoi ai.
Asnjë grup nuk mori menjëherë përgjegjësinë për sulmin, por Ministria e Brendshme e Sirisë raportoi se një ekstremist i Shtetit Islamik hyri në kishë, qëlloi mbi pjesëmarrësit dhe më pas hodhi veten në erë me një jelek shpërthyes, gjë që u konfirmua nga dëshmitarët.
Një dëshmitar, i cili e identifikoi veten si Rawad, tha se e pa sulmuesin, i cili shoqërohej nga dy persona të tjerë që ikën ndërsa ai po drejtonte makinën pranë kishës.
"Ai qëlloi para kishës... pastaj hyri në kishë dhe hodhi veten në erë", tha ai.
