Grupi militant libanez Hezbollah nuk do t’i përmbahet asnjë marrëveshjeje që mund të rezultojë nga bisedimet e drejtpërdrejta Liban-Izrael në SHBA, negociata të cilave ai i kundërshton fuqimisht, tha një zyrtar i lartë i Hezbollahut.
Wafiq Safa, një anëtar i lartë i këshillit politik të Hezbollahut, foli në prag të bisedimeve që priten në Uashington midis ambasadorëve libanezë dhe izraelitë në SHBA.
Do të jetë hera e parë në dekada që të dërguarit nga Libani dhe Izraeli, të cilët nuk kanë marrëdhënie diplomatike, takohen ballë për ballë në bisedime të drejtpërdrejta.
“Sa i përket rezultateve të këtyre negociatave midis Libanit dhe armikut izraelit, ne nuk jemi aspak të interesuar dhe as të shqetësuar për to”, tha Safa për Associated Press.
Më vete, udhëheqësi i Hezbollahut i kërkoi Libanit të tërhiqej nga bisedimet me Izraelin. Naim Kassem foli në një fjalim televiziv në prag të takimit të planifikuar.
Raundi i fundit i luftimeve u nxit nga hedhja e raketave nga Hezbollahu në Izraelin verior më 2 mars, pasi SHBA-të dhe Izraeli sulmuan Iranin.
Të paktën 2,055 persona janë vrarë në sulmet izraelite në Liban, thotë ministria e Shëndetësisë, ndërsa 6,588 të tjerë janë plagosur. Më shumë se 1 milion njerëz janë zhvendosur.
Qeveria e Libanit, e cila thotë se është e përkushtuar për çarmatosjen e Hezbollahut, kishte bërë thirrje për bisedime të drejtpërdrejta në fillim të luftës. Javën e kaluar, Izraeli njoftoi miratimin e tij për bisedime.
