Kryeministri izraelit Benjamin Netanyahu ishte paralajmëruar se Hamasi po planifikonte një ofensivë, dhjetë ditë para sulmit të 7 tetorit 2023, raportoi gazeta “Haaretz”, të mërkurën, transmeton KosovaPress.
Sipas raportimit, paralajmërimi erdhi nga presidenti i Emirateve të Bashkuara Arabe, Mohammed bin Zayed. Ai i kishte thënë Netanyahut se lideri i atëhershëm i Hamasit në Gazë, Yahya Sinwar, po përgatiste një operacion.
Bin Zayed kishte paralajmëruar se sulmi mund të shkaktonte gjakderdhje, të destabilizonte rajonin dhe të dëmtonte Marrëveshjet e Abrahamit.
Netanyahu dyshohet se kishte reaguar qetë, duke thënë se Izraeli ishte i përgatitur për çdo skenar. Ai kishte vlerësuar se një sulm kishte më shumë gjasa të vinte nga Bregu Perëndimor.
Zyra e kryeministrit izraelit e quajti raportimin “gënjeshtër absolute”. Ajo mohoi se Netanyahu kishte biseduar me presidentin e Emirateve gjatë periudhës së përmendur.
Ministria e Jashtme e Emirateve nuk komentoi mbi bisedat e pretenduara. Ajo deklaroi se informacionet relevante vazhdojnë të shkëmbehen përmes kanaleve të inteligjencës.
Çështja ka marrë rëndësi edhe në prag të zgjedhjeve në Izrael. Kundërshtarët politikë e akuzojnë Netanyahun se shpërfilli paralajmërimet para sulmit, në të cilin u vranë rreth 1.200 persona dhe u morën 251 pengje.
Sipas Ministrisë së Shëndetësisë në Gazë, ofensiva izraelite që pasoi këto sulme, ka vrarë më shumë se 73.650 palestinezë.
