Rreth 8 mijë palestinezë protestuan në 5 zona të ndryshme të kufirit të Gazës, si vazhdim i protestave të quajtura “Marshi i Rikthimit” dhe që zhvillohen rregullisht çdo të premte, që prej 30 Marsit.
Të paktën 14 palestinezë kanë mbetur të plagosur gjatë përplasjeve përgjatë kufirit, sipas burimeve nga Ministria palestineze e Shëndetësisë, ndërsa dyshohet edhe për një tjetër të vrarë.
Protesta e kësaj jave u mbajt nën moton “Normalizimi është tradhti” dhe organizatorët u bënë thirrje protestuesve që të vazhdojnë këto demonstrime derisa “rrethimi” të hiqet.
“Pjesëmarrja e mijëra demonstruesve në marshime sot është një përgjigje për të gjitha përpjekjet për kërcënime dhe kontrabandë, që kanë për qëllim parandalimin e demonstratave. Populli palestinez do të vazhdojë përpjekjet e tij për të hequr rrethimin njëherë e përgjithmonë”, tha një zëdhënës i Hamasit.
Protestuesit vazhduan të djegin goma dhe të gjuanin me gurë drejt ushtarëve izraelitë. Gjenerali i Përgjithshëm Kamil Abu Rukun, dje, i ka dërguar një paralajmërim protestuesve të mundshëm të Gazës.
“Ne nuk do të tregojmë përmbajtje dhe nuk do të jemi të butë ndaj askujt që shkel urdhrat e mëposhtëm: Cilido që afrohet në një distancë prej 100 metrash nga gardhi, do të vihet në rrezik dhe unë sugjeroj që të zgjoheni dhe të kuptoni se Hamasi dhe organizatat e tjera terroriste po ju çojnë në buzë të humnerës. Kuptoni këtë para se të jetë tepër vonë”, tha Rukun.
