Janë zhvilluar vetëm tri ndeshje në mbrëmjen e së dielës në NBA.
Dueli mes Boston Celtics dhe Oklahoma City Thunder ishte ndeshja kryesore e mbrëmjes në NBA.
Në TD Garden, u ndal ecuria pozitive prej shtatë fitoresh radhazi e skuadrës së trajnerit Billy Donovan me Oklahomën që u mposht pas një ndeshje shumë të bukur me rezultatin 134-129 nga Boston.
Fantastik në këtë sfidë ishte Kyrie Irving i cili realizoi 30 pikë 11 asistime dhe 4 kërcime, ndërkohë që në krahun tjetër Oklahomës nuk i mjaftuan 37 pikët e Paul George por edhe triple-double i rradhës i Rusell Westbrook prej 22 pikëve, 16 asistimeve dhe 12 kërcimeve.
U rikthye te fitorja edhe Toronto Raptors. Skuadra kanadeze mposhti lehtësisht në shtëpi Los Angeles Clippers me rezultatin 121-103.
Kawhi Leonard me 18 pikë dhe Serge Ibaka me 16 pikë e 12 kërcime ishin dy basketbollistët më të mirë mbi parket për Raptors që me këtë fitore blinduan vendin e dytë në Lindje.
Për të thelluar krizën e New York Knicks skuadrës më të dobët në këtë sezon të NBA mendoi Memphis Grizzlies.
Skuadra nga “Molla e Madhe” pësoi disfatën e 13-të rresht dhe të 21-ën në 22 ndeshjet pasi u mposht me shifrat 84-96 nga Memphis.
Mike Conley dhe Marc Gasol respektivisht me 25 dhe 24 pikë ishin dy lojtarët që udhëhoqën Grizzlies drejt kësaj fitoreje.