Të gjithë e presin me padurim ndeshjen e kombëtares së Kosovës me Rumaninë, e cila luhet të dielën (në orën 20.30) e 24 shkurtit në Qendrën e Rinisë dhe të Sportit në Prishtinë. Kjo sfidë i takon Grupit B të parakualifikimeve për Eurobasket 2021. Rumania është në vend të dytë me pesë pikë, ka dy më shumë se Kosova. Secila nga kombëtaret ka zhvilluar deri me tash nga 3 ndeshje dhe Rumania ka dy fitore e një humbje, kurse Kosova ka pësuar tri humbje. Ish basketbollisti i mirënjohur Besim Maxhuni ka deklaruar se për te dyja kombëtaret ka rendësi fitorja.
Si e sheh ndeshjen Kosova-Rumania, cila është më afër qëllimit? “Së pari për të dyja palët fitorja ka rëndësi, për ne që të bëjmë fitoren e parë dhe t’i gëzojmë tifozët tanë, që shpresoj do të vijnë në një numër sa më të madh dhe njëkohësisht edhe rumunëve që të vazhdojnë me fitore, pasi e mposhtën Maqedoninë në xhiron e kaluar. Shpresoj se ne jemi më afër fitores pasi luajmë në terrenin tonë, kanë përkrahjen e tifozëve të flaktë ‘Dardanët’”, thotë Maxhuni për gazetën kombëtare “Bota sot”.
Ku i sheh përparësitë e Kosovës, kush mund ta bëj diferencën? “Se pari pasi luajmë në terrenin tonë, përpara tifozëve të flaktë, ku do të jenë lojtari ynë i 6-të, të cilët shpresoj që do të jetë përparësi për ne dhe njëkohësisht i kemi disa lojtarë të mirë. Pres edhe nga amerikani i ri, pasi ka një eksperiencë të madhe, që të na drejtoj drejt fitores dhe të organizoj lojën mu ashtu si ka nevojë Kosova”, përfundoi Maxhuni.