Kryeministri i Kosovës, Albin Kurti sot ka pritur në takim Edona Thaqin, basketbollisten tonë që ka ardhur nga Shtetet e Bashkuara të Amerikës për të përfaqësuar për herë të parë Kosovën.
Kryeministri ka folur me admirim për përkushtimin e basketbollisteve tona dhe ka uruar që rasti i ardhjes së Edonës, të jetë vetëm fillimi i kthimit të talentëve për të përfaqësuar vendlindjen e tyrem njofton FBK.
Edona është prej basketbollisteve më të mira dhe një përforcim i madh për Kombëtaren tonë.
Kosova tash e disa po përgatitet për garën në Qipro.
Stërvitjen e fundit vashat “Dardane” e zhvillojnë të dielën në palestrën sportive të Kolegjit "ISP" në Marigona Residence nga ora 17:00 , ndërsa udhëtojnë drejt Qipros më 27 qershor, kurse nga 28 qershori zhvillojnë garat në FIBA Kampionatin Evropian të Shteteve të Vogla.
Ndeshjen e parë Kosova e zhvillon më 28 qershor me Maltën, pastaj më 29 qershor ballafaqohet me Andorrën. Më 30 qershor Kosova do të zhvillojë ndeshjen e parafundit me Qipron, kurse ndeshjen e fundit e zhvillon më 2 korrik ndaj Norvegjisë.
