Basketbollistët U16 nisen sonte për Bosnjë, për viza u angazhua ambasada e SHBA-së - Bota Sot
Basketbollistët U16 nisen sonte për Bosnjë, për viza u angazhua ambasada e SHBA-së

Basketboll

Basketbollistët U16 nisen sonte për Bosnjë, për viza u angazhua ambasada e SHBA-së

Më: 10 gusht 2018 Në ora: 21:33
Federata e Basketbollit të Kosovës

Federata e Basketbollit të Kosovës (FBK) nëpërmjet një komunikate njofton opinionin e gjerë se Përfaqësuesja U16 e Kosovës (Meshkujt) sonte në ora 20:15 është pajisur me viza të Bosnje e Hercegovinës dhe se në ora 23:00 do të udhëtojë për në Sarajevë, atje ku edhe mbahet FIBA U16 Kampionati Evropian, Divizioni B.

“Pas katër ditë pritje para Ambasadës së Bosnje e Hercegovinës në Shkup dhe pas trysnisë së madhe nga FIBA, KON, FBK, KOK-u dhe së fundi edhe me angazhimin e Ambasadës së Shteteve të Bashkuara të Amerikës në Sarajevë, Ministria e Punëve të Jashtme e Bosnje e Hercegovinës e ka dhënë lejen për pajisje me viza për Kosovën U16”, thuhet në njoftimin për media të FBK-së.

Në këtë njoftim thuhet se përfaqësuesja e Kosovës është dashur të jetë qysh të mërkurën në Sarajevë për ta zhvilluar stërvitjen e parë dhe më pas të enjten ta zhvillojë ndeshjen e parë pikërisht kundër Bosnje e Hercegovinës, por nuk ka mundur ta bëjë një gjë të tillë për shkak se Ministria e Punëve të Jashtme prej të martës ka refuzuar të pajisë me viza Kosovën U16.

Kosova është pjesë e Grupit D së bashku me Republikën Çeke, Ukrainën, Bjellorusinë, Zvicrën dhe Bosnje e Hercegovinën.

Për programin e ndeshjeve të Përfaqësueses U16, FBK thotë se do ta njoftojë opinionin më vonë.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...