Janë bërë edhe matjet zyrtare dhe duket të jetë gjithçka gati për meçin Krasniqi – Grafka.
Pothuajse 10 muaj pas humbjes me gjermanin Arthur Abraham boksieri kosovar Haxhi Krasniqi do të zbresë në ring për t’u ndeshur me polakun Bartlomiej Grafka.
Disfata e 22 prillit në Erfurt, ku Robin Krasniqi emri me të cilin 30-vjecari nga Juniku njihet më së shumti, u mund me vendim unanim nga veterani me origjinë armene, është hedhur pas krahëve prej kohësh.
Tani është koha për t’u ringritur dhe për të fituar pozicione në klasifikimin e përgjithshëm, kështu që Haxhi Krasniqi ka në mendje vetëm fitoren.
Sportisti kosovar që bokson për Gjermaninë, vendin ku familja e tij u zhvendos gjatë Luftës së Kosovës është përgatitur më së miri për duelin me Bartlomiej Grafkën, kundërshtarin e tij të radhës, që në Poloni renditet i pesti për nga rëndësia në peshën e mesme dhe që ka humbur pesë nga shtatë ndeshjet e fundit.
Në fakt ky duel këtë radhë është i vlefshëm për peshën super të mesme, pra deri në 76 kilogram dhe me vetëm 8 raunde gjithsej.
Haxhi Krasniqi nuk pritet të ketë probleme ndaj një kundërshtari si Grafka, që ka fituar vetëm 20 nga 50 ndeshjet e zhvilluara. Tashmë janë bërë edhe matjet zyrtare dhe duket gjithçka gati për mecin e së shtunës.
Meçi do të zhvillohet në Gjermani në Erdgas Arena, Halle an der Saale, në Sachsen – Anhalt.