Bota e kinematografisë është tronditur nga lajmi për vdekjen e parakohshme të aktorit amerikan RJ Mitte, i cili fitoi famë ndërkombëtare me rolin e Walter White Jr. në serialin e njohur “Breaking Bad”.
Aktori amerikan RJ Mitte ka ndërruar jetë në moshën 34-vjeçare. Lajmi për vdekjen e tij është konfirmuar të hënën, më 12 tetor, nga përfaqësuesit e aktorit.
Sipas BBC-së, Mitte ka vdekur në Brownsville të Teksasit, ndërsa shkaku i vdekjes nuk është bërë i ditur zyrtarisht.
Aktori u bë i njohur për publikun ndërkombëtar në vitin 2008, kur mori rolin e Walter White Jr., djalit të personazhit kryesor Walter White, të interpretuar nga Bryan Cranston, në serialin e suksesshëm amerikan “Breaking Bad”.
Ai ishte vetëm 15 vjeç kur iu bashkua kastit të serialit, i cili u transmetua deri në vitin 2013 dhe fitoi një numër të madh çmimesh ndërkombëtare.
Përtej karrierës artistike, Mitte njihej edhe për angazhimin e tij në mbrojtjen e të drejtave të personave me aftësi të kufizuara.
Aktori jetonte me paralizë cerebrale, një gjendje që ndikon në lëvizjen dhe koordinimin e trupit. Përvoja e tij personale e ndihmoi të sillte autenticitet në interpretimin e Walter White Jr., personazh që gjithashtu jetonte me këtë gjendje.
Gjatë karrierës, ai u angazhua në organizata humanitare dhe fushata për përfshirjen dhe përfaqësimin më të mirë të personave me aftësi të kufizuara në industrinë e argëtimit.
Përveç “Breaking Bad”, Mitte luajti edhe në produksione të tjera televizive dhe kinematografike, përfshirë “Switched at Birth”, “Vegas” dhe “Now Apocalypse”.
Vdekja e tij ka nxitur reagime nga kolegë dhe figura të njohura të industrisë së filmit. Aktori Dean Norris, i cili interpretoi Hank Schrader në “Breaking Bad”, është shprehur i pikëlluar nga lajmi, duke e kujtuar Mitte si një të ri të dashur dhe të respektuar në sheshxhirim.
RJ Mitte lë pas një karrierë që, ndonëse e shkurtër, ndikoi jo vetëm në televizionin amerikan, por edhe në ndërgjegjësimin publik për të drejtat dhe përfaqësimin e personave me aftësi të kufizuara. / BS