Të paktën 20 persona kanë humbur jetën dhe 71 janë lënduar në pjesën qendrore të Meksikës nga një shpërthim i një gypi karburantesh, për të cilin dyshohet se është dëmtuar nga hajnat e naftës. Lajmin e ka bërë të ditur qeveria rajonale e Hidalgos, ndërsa viktimat kanë qenë duke mbushur shishe me naftë në momentin e shpërthimit.
Në pamjet e siguruara nga një televizion meksikan është parë flakë e madhe në qiell dhe njerëz që thërrisnin për ndihmë. “Raporti preliminar është shumë serioz, më është thënë se 20 njerëz janë djegur dhe kanë vdekur”, tha guvernatori i këtij rajoni, Omar Fayad, për televizionin meksikan.
Ai u ka bërë thirrje njerëzve që të mos marrin naftë nga gypat në mënyrë ilegale, duke thënë se kështu po e rrezikojnë jetën e tyre dhe të familjeve të tyre. Presidenti i Meksikës, Andres Manuel Lopez Obrador, ka lansuar një fushatë të rreptë kundër vjedhjes së karburanteve, e cila sipas qeverisë i kushton shtetit më shumë se tre miliardë dollarë në vit.
Gypi i shpërthyer ishte afër rafinerisë shtetërore të Tulas dhe i përkiste kompanisë publike të karburanteve “Petroleos Mexicanos”, e cila përmes një deklarate ka thënë se fajtorë për këtë shpërthim janë hajnat e naftës.
Nisma e presidentit meksikan për luftë kundër hajnave të karuburanteve ka gjetur mbështetje të madhe nga popullsia, ndonëse vendimi i tij për ta transportuar naftën me kamionë ka shkaktuar pengesa në furnizim dhe ekziston frika se ky vendim do ta dëmtojë ekonominë, shkruan “The Guardian”.
