Qytetarë të Zelandës së Re iu bashkuan faljes së Xhumasë në qytetin Kristçërç, në kujtim të 50 njerëzve të vrarë nga të shtënat në dy xhami, të premten e kaluar.
Në mesin e të tubuarve ishte edhe kryeministrja Jacinda Ardern.
"Zelanda e Re mban zi me ju. Ne jemi një", tha ajo.
Australiani Brenton Tarrant, 28 vjeç, i vetëpërshkruar si supremacist i bardhë, u akuzua për vrasjet në xhami.
Ai do të paraqitet në gjykatë më 5 prill.
Kryeministrja Ardern mori vendim këtë javë që Zelanda e Re t'i ndalojë të gjitha llojet e armëve gjysmë-automatike dhe pushkët me shënjestrim.
"Historia jonë ndryshoi përgjithmonë. Tani, edhe ligjet tona do të ndryshojnë", tha Ardern.
Sulmuesi i xhamive e ka transmetuar drejtpërdrejt në Facebook aktin e tij.
Të martën, Facebook tha se videoja e sulmuesit është shikuar më pak se 200 herë gjatë transmetimit të drejtpërdrejtë dhe rreth 4,000 herë përpara se është hequr nga Facebook-u.
