Erdogani: Sistemet ruse S-400 mund të arrijnë më herët - Bota Sot
Erdogani: Sistemet ruse S-400 mund të arrijnë më herët

Bota

Erdogani: Sistemet ruse S-400 mund të arrijnë më herët

Më: 10 prill 2019 Në ora: 14:47
Foto ilustrim

Presidenti turk, Rexhep Taip Erdogan, ka bërë me dije se sistemet ruse për mbrojtje ajrore mund të arrijnë në Turqi më shpejt se që është planifikuar, pavarësisht pse një blerje e tillë ka nxitur debate me anëtarin tjetër të NATO-s, Uashingtonin.

“Dorëzimi i sistemeve ajrore S-400 ishte planifikuar të ndodhte në muajin korrik, mirëpo ato mund të arrijnë më herët”, u ka thënë Erdogani gazetarëve pas udhëtimit që ka realizuar në Rusi, kanë raportuar mediet turke më 10 prill.

Shtetet e Bashkuara i kanë kërkuar Ankarasë që të anulojë marrëveshjen me Rusinë duke thënë se sistemet ruse nuk janë në përputhshmëri me sistemet e NATO-s dhe janë konsideruar rrezik për aeroplanët amerikanë të llojit, F-35.

Më 1 prill, Uashingtoni ka thënë se do të ndalojë dërgimin e këtij lloji të aeroplanëve në Ankara, pas vendimit të Turqisë për të vazhduar me blerjen e sistemeve ajrore ruse.

Mediet ruse kanë raportuar se Turqia synon të blejë katër sisteme ruse S-400 në vlerë të 2.5 miliardë dollarëve.

Në një intervistë televizive më 10 prill, ministri i Jashtëm turk, Mevlut Cavusoglu, ka thënë se shteti i tij do të shikojë “diku tjetër” nëse Shtetet e Bashkuara nuk pranojnë që t’i shesin aeroplanët ushtarakë, F-35.

Cavusoglu ka thënë se Turqia po ashtu do të konsiderojë blerjen e më shumë sistemeve ruse, S-400 nëse nuk mund të blejë edhe sistemet Patriot.

Në Moskë, zëdhënësi i Kremlinit, Dmitry Peskov ka thënë se Rusia është e “hapur” për një blerje të dytë.

Marrëdhëniet e Turqisë me Rusinë kanë qenë historikisht të tensionuara, mirëpo Moska dhe Ankaraja kanë krijuar lidhje të forta ekonomike prej përfundimit të Luftës së Ftohtë.

Nën udhëheqësinë e presidentit turk, Erdogan dhe homologut të tij rus, Vladimir Putin, këto dy shtete kanë rritur bashkëpunimin dhe kanë tensionuar lidhjet qoftë Rusia me Perëndimin ashtu edhe Turqia me SHBA-në dhe Bashkimin Evropian.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...