Autoritetet ruse kanë njoftuar se zjarri vdekjeprurës në një aeroplan udhëtarësh është shkaktuar nga një gabim i pilotit, nga një problem teknik ose nga kushtet e rënda të motit. Kjo deklaratë ndërlidhet me raportimet se aeroplani ishte goditur nga rrufeja.
Ekipi i punëtorëve të emergjencës tha se i kanë nxjerrë 41 trupa të viktimave nga pjesa e pasme e aeroplanit, i cili është prodhuar në Rusi dhe është i tipit “Sukhoi Superjet 100”. Ky është aksidenti ajror më vdekjeprurës në Rusi viteve të fundit.
Ministri rus i transportit ka deklaruar më herët se nuk ka arsye për t’i larguar nga përdorimi aeroplanët e këtij prodhuesi, i cili është më i madhi i këtij lloji që nga shpërbërja e Bashkimit Sovjetik.
Zjarri e kishte kapluar pjesën e pasme të aeroplanit gjatë lëshimit emergjent në aeroportin “Sheremtyevo” të Moskës pas disa përpjekjeve të pasuksesshme dhe pas përdorimit të rezervave të karburantit.
Në mesin e 41 viktimave janë edhe dy fëmijë. Aeroplani ishte duke fluturuar drejt qytetit verior të Murmanskut, por u detyrua të kthehej në Moskë pak minuta pas ngritjes në qiell.
Anëtarët e ekuipazhit thanë se aeroplani fillimisht u godit nga breshëri, e më pas nga rrufeja. Piloti Denis Yevdokimov tha: “Aeroplanit iu shkëputën të gjitha lidhjet dhe sistemi elektronik i fluturimit”, shkruan “The Guardian”.
