OBSh-ja: Një vetëvrasje ndodh në botë për çdo 40 sekonda - Bota Sot
OBSh-ja: Një vetëvrasje ndodh në botë për çdo 40 sekonda

Bota

OBSh-ja: Një vetëvrasje ndodh në botë për çdo 40 sekonda

Më: 9 shtator 2019 Në ora: 15:58
Ilustrim

Sipas statistikave të reja të Organizatës Botërore të Shëndetësisë, numri i vetëvrasjeve në botë është duke rënë. Sidoqoftë, në botë ende ndodh një vetëvrasje për çdo 40 sekonda. Kjo organizatë ka kërkuar më shumë masa nga qeveritë e shteteve për ta parandaluar këtë dukuri shqetësuese.

Organi për shëndetësi i Kombeve të Bashkuara tha se numri i vetëvrasjeve në botë ka rënë për 9.8 për qind nga viti 2010 deri në vitin 2016. Sidoqoftë, në Amerikën Veriore dhe Amerikën Jugore gjatë kësaj periudhe është shënuar rritje e numrit të vetëvrasjeve.

“Secila vdekje është tragjedi për familjen, miqtë dhe kolegët. Sidoqoftë, vetëvrasjet mund të parandalohen. U bëjmë thirrje shteteve që të fusin strategji për parandalimin e vetëvrasjeve në programet e tyre kombëtare për shëndet dhe arsim dhe që kjo të bëhet në mënyrë të qëndrueshme”, tha drejtori i përgjithshëm i Organizatës Botërore të Shëndetësisë, Tedros Adhanom Ghebreyesus.

Kjo organizatë tha se në botë çdo vit nga vetëvrasja vdesin rreth 800 mijë njerëz, më shumë sesa nga malaria, kanceri i gjirit apo nga lufta dhe vrasjet. Sipas zyrtarëve të kësaj organizate, vetëm 38 shtete në botë kanë strategji për parandalimin e vetëvrasjeve.

Organizata Botërore e Shëndetësisë tha se një nga mënyrat e zvogëlimit të shkallës së vetëvrasjeve është kufizimi i qasjes në pesticide, të cilat, së bashku me varjen dhe armët e zjarrit, janë ndër mënyrat kryesore të vetëvrasjes. Për shembull, ndalimi i pesticideve të rrezikshme ka ndikuar që numri i vetëvrasjeve të bie për 70 për qind brenda 20 vjetësh, shkruan “CNN”.

Shfaq komentet
comments powered by Disqus
Sot mund të lexoni Shfletoni kopertinat
Sondazh Pas votimit të projektligjeve për shndërrimin e FSK-së në ushtri, a mund të ketë inskenime nga Serbia për një luftë të re në Ballkan?
Loading...