Dy ditë përleshje midis forcave të regjimit dhe grupeve të armatosura në bastionin e fundit të madh të opozitës në Siri kanë vrarë afro 70 njerëz nga të dy palët, duke minuar një marrëveshje armëpushimi disa muajsh, tha të dielën një monitorues i luftës, raporton France24.
Betejat në provincën veriperëndimore të Idlib janë "më të dhunshmet" atje që kur një marrëveshje e armëpushimit me ndërmjetësi ruse hyri në fuqi në fund të gushtit, tha Rami Abdul Rahman, kreu i Observatorit Sirian për të Drejtat e Njeriut.
Banorët e fshatrave të prekur ikën në veri për t'i shpëtuar luftimeve, duke shtuar qindra mijëra të cilët tashmë kanë vërshuar nga jugu i rrënuar nga dhuna në provincë pasi luftimet u përshkallëzuan në fillim të këtij viti.