Japonia i ka regjistruar 112 raste të koronavirusit të dielën. Kjo është shifra më e lartë ditore që nga 25 maji, kur vendi i Azisë Lindore e kishte hequr gjendjen emergjente.
Përpos rasteve të infektimeve, Ministria e Shëndetësisë e Japonisë njoftoi se gjatë 24 orëve të kaluara është regjistruar edhe një viktimë, shkruan “CNN”.
Rastet e koronavirusit kanë shënuar rritje të vazhdueshme ditëve të fundit në Japoni. Mbi 100 raste u shënuan për herë të dytë në tri ditët e kaluara.
Sekretari i Kabinetit, Yoshihide Suga, tha të hënën se qeveria nuk beson se është e nevojshme që të rivendoset gjendja emergjente, pavarësisht rritjes së numrit të rasteve.
Ai shtoi se shtimi i rasteve është rezultat i rritjes së numrit të testimeve te personat që kanë pasur kontakte të ngushta me të infektuarit.
Deri më tani, Japonia i ka regjistruar 18,366 raste të koronavirusit dhe 972 të vdekur. Kryeqyteti Tokio e shënoi shifrën më të lartë ditore në dy muajt e fundit me 60 raste të reja.