Tetëdhjetë e pesë foshnje nën moshën 1 vjeçare kanë rezultuar pozitiv me COVID-19 në një qark të Teksasit.
Në qarkun Nueces, numri i rasteve të reja të COVID-19 është rritur gjatë muajit korrik. Virusi ka infektuar dhjetëra foshnje dhe zyrtarët lokalë po u kërkojnë njerëzve që të mbajnë maska dhe të respektojnë distancën sociale.
“Aktualisht në Nueces kemi 85 foshnje nën moshën 1 vjeçare që kanë rezultuar pozitiv me COVID-19. Këto foshnje ende nuk e kanë festuar ditëlindjen e tyre të parë. Ju lutemi na ndihmoni ta ndalojmë përhapjen e kësaj sëmundje”, tha Annette Rodriguez, drejtoreshë e Shëndetit Publik në Nueces, përcjell Telegrafi.
Sipas Universitetit Johns Hopkins, që nga muaji janar, autoritetet shëndetësore kanë identifikuar më shumë se 3.6 milionë raste me COVID-19 në të gjithë Shtetet e Bashkuara. Gati 140 mijë prej tyre kanë vdekur.
Kurse, në Nueces janë rreth 8,100 raste me COVID-19, ku 82 kanë vdekur.
