Sipas të dhënave të agjencisë Reuters, numri i përgjithshëm i viktimave të koronavirusit në tërë botën ka shkuar në mbi 700 mijë. Shifrat më të mëdha të të vdekurve po i shënojnë Shtetet e Bashkaura, Brazili, India dhe Meksika.
Rreth 5 mijë e 900 persona po vdesin nga Covid-19 çdo 24 orë në nivel botëtor, sipas të dhënave të kësaj agjencie, të nxjerra nga statistikat e dy javëve të fundit. Kjo nënkupton që janë shënuar mesatarisht 247 të vdekur në orë ose një i vdekur për çdo 15 sekonda.
Presidenti amerikan, Donald Trump, tha se përhapja e koronavirusit është nën kontroll për aq sa ekzistojnë mundësitë, ndonëse në ShBA janë shënuar mbi 155 mijë viktima, që është shifra më e lartë në botë.
“Ata po vdesin, kjo është e vërtetë. Por kjo nuk nënkupton që ne nuk po bëjmë gjithçka që mundemi. Është nën kontroll për aq sa mund të kontrollohet. Kjo është një epidemi e tmerrshme”, tha ai gjatë një interviste.
Në Brazil, presidenti Jair Bolsonaro e ka minimizuar efketin e pandemisë dhe i ka kundërshtuar masat kufizuese, ndonëse disa anëtarë të kabinetit të tij janë infektuar me virusin e ri.
Koronavirusi ishte përhapur fillimisht më pak në Amerikën Latine, ku banojnë rreth 640 milionë njerëz. Megjithatë, zyrtarët u përballën me vështirësi për ta kontrolluar përhapjen e madhe më vonë për shkak të varfërisë në rajon dhe qyteteve me popullsi të dendur.
