Ministria e Mbrojtjes e Rusisë tha të martën se një luftanije ruse ka gjetur një luftanije amerikane të tipit “USS John S. McCain” duke operuar ilegalisht në ujërat ruse në Detin e Japonisë, por e ka ndjekur dhe e ka larguar atë nga zona.
Moska tha se forcat ruse me anijen “Admiral Vinogradov” e kanë paralajmëruar verbalisht anijen amerikane dhe kanë kërcënuar se do ta godasin atë me forcë që të largohej nga zona ku është parë.
Në deklaratën e Ministrisë së Mbrojtjes thuhet se pas vërejtjes, anija amerikane është tërhequr menjëherë dhe është vendosur në ujëra neutrale, shkruan Reuters.
Incidente të tilla janë të rralla, por ato i vënë në pah raportet e dobëta diplomatike dhe ushtarake mes Rusisë dhe Shteteve të Bashkuara, marrëdhëniet e të cilave janë ende të tensionuara që pas Luftës së Ftohtë.
Moska tha se anija ruse ka qenë duke e përcjellë lëvizjen e anijes amerikane, e cila ishte futur dy kilometra përtej kufirit detar. Incidenti thuhet se ndodhi në Gjirin Peteri i Madh.
Sipas zyrtarëve rusë, anija amerikane nuk ka bërë më përpjekje që të futet në ujërat e Rusisë pas tërheqjes.
