Sekretari Amerikan i Shtetit, Antony Blinken tha se është e domosdoshme që vendet evropiane të ndalojnë së mbështeturi te energjia ruse.
Në një konferencë të përbashkët shtypi në Talin me kryeministren e Estonisë, Kaja Kallas, Blinken u shpreh se “në këtë moment, shumë vende në Evropë, duhet të heqin dorë nga varësia tek energjia ruse, sepse Moska po e përdor si armë”.
Ndërsa Kallas bëri thirrje Rusia dhe Bjellorusia të përjashtohen nga rrjeti i transaksioneve bankare SWIFT dhe të kufizohet aksesi i tyre në kriptovaluta.
“Vendet duhet të fokusohen në “izolimin e plotë” të Rusisë nga bota e lirë”, tha ajo duke shtuar se bota duhet të përgatitet për më të keqen.
“Prandaj, dhuna e Putinit duhet të jetë në korrelacion me sanksionet e mëtejshme dhe gjithashtu vendimet e izolimit”, u shpreh Kallas.
