Gazetarët e vrarë ose të plagosur gjatë pushtimit rus të Ukrainës u nderuan të enjten në një ekspozitë në Kiev.
“Lufta vazhdon, lufta nuk ka mbaruar. Dhe kjo është një luftë në të cilën po vdesin qytetarët tanë, në të cilën po vdesin gazetarë ukrainas dhe të huaj,” tha Tetyana Teren, drejtore ekzekutive e PEN Ukraine, një nga organizatorët e ekspozitës. .
“Kjo është arsyeja pse ne kërkojmë nga mediat e huaja të tregojnë të vërtetën për këtë luftë dhe të vazhdojnë t’i tregojnë botës për krimet e Rusisë në vendin tonë,” tha ajo për AFP.
Portrete të gazetarëve dhe punonjësve të medias që janë bërë viktima të konfliktit shikojnë kalimtarët nga tabelat e mëdha bardh e zi në qendër të kryeqytetit.
Ekspozita titullohet “Lufta nuk ka mbaruar akoma” dhe organizohet nga autoritetet e qytetit të Kievit me grupet e mbrojtjes së të drejtave të njeriut dhe shtypit.
Në ekspozitë tregohen historitë e reporterëve që janë vrarë, plagosur ose persekutuar pasi Rusia pushtoi fqinjin e saj pro-BE më 24 shkurt.
“Okupatorët rusë vranë gazetarin, regjisorin dhe producentin amerikan Brent Renaud”, shkruhet në një nga panelet e mëdha të instaluara në një park në qendër të Kievit.
Renaud, i cili vdiq më 13 mars, ishte gazetari i parë i huaj që u vra nga forcat ruse pas pushtimit më 24 shkurt, thanë organizatorët e ekspozitës.
Gazetarë të tjerë që kanë humbur jetën gjatë luftës, përfshijnë kameramanin franko-irlandez të Fox News, Pierre Zakrzewski, i cili vdiq më 14 mars së bashku me producenten ukrainase Oleksandra Kuvshynova.
Automjeti i tyre u godit nga zjarri, duke plagosur korrespondentin Benjamin Hall, në Horenka jashtë kryeqytetit ukrainas.
Francezi Frederic Leclerc-Imhoff, vdiq më 30 maj duke shoqëruar civilët në bordin e një autobusi evakuimi në lindje të Ukrainës.
“Tani që kanë kaluar katër muaj nga fillimi i pushtimit në shkallë të plotë, është më e rëndësishme se kurrë që të intensifikohet fokusi i botës në Ukrainë”, thanë organizatorët në një deklaratë.
“Kjo ekspozitë është një shprehje solidariteti me profesionistët e medias ukrainase që luftojnë për të vërtetën, duke rrezikuar jetën e tyre”, shtuan ata.
Grupi për të drejtat e medias “Reporterët pa Kufi” thanë të mërkurën se ushtarët rusë vranë fotoreporterin ukrainas Maks Levin në mars, ndoshta pasi e kishin torturuar.
Grupi ndërkombëtar i avokimit tha se tetë reporterë janë vrarë dhe 16 të tjerë janë plagosur që nga fillimi i pushtimit rus.
