Një tërmet me magnitudë 7.0 goditi provincën perëndimore të Javas Lindore të Indonezisë, por nuk kishte raporte paraprake për dëme apo viktima, thanë agjencia e motit dhe zyrtarët e vendit.
Agjencia e meteorologjisë, klimatologjisë dhe gjeofizikës e vendit të Azisë Juglindore mati fillimisht tërmetin me magnitudë 6.6 ballë përpara se ta rishikonte atë.
Agjencia nuk lëshoi një paralajmërim për cunami pasi lëkundjet nuk kishin potencialin të shkaktonin valë gjigante.
Epiqendra e tërmetit ishte 100 km në veriperëndim të rrethit Tuban në një thellësi prej 633 km nën shtratin e detit, tha agjencia.
Kreu i Divizionit për Zbutjen e Tërmeteve dhe Cunamit të agjencisë, Daryono tha se lëkundjet u ndjenë edhe në provincat e Java Perëndimore, Banten, West Nusa Tenggara, Bali dhe Yogyakarta.
“Epiqendra është shumë e thellë, kështu që lëkundjet e tij arritën në një distancë të gjatë dhe zona të gjera, duke përfshirë të gjithë ishullin Java, ishullin Bali dhe provincën West Nusa Tenggara. Ky tërmet nuk është shkatërrues,” tha ai.
Zyrtarë të lartë të agjencisë kombëtare të menaxhimit dhe zbutjes së fatkeqësive BNPB dhe Agjencisë Kombëtare të Kërkimit dhe Shpëtimit thanë se nuk kishte raportime për dëme apo viktima pas tërmetit.
Megjithatë, agjencia e fatkeqësive ka punuar për të koordinuar me administratat në provincat ku u ndjenë lëkundjet për të vlerësuar ndikimet e mundshme të tërmetit, tha zëdhënësi i BNPB, Abdul Muhari.
Zëdhënësi i Agjencisë Kombëtare të Kërkimit dhe Shpëtimit, Yusuf Latief, konfirmoi se nuk kishte raporte për shtëpi, ndërtesa apo objekte infrastrukturore të dëmtuara nga lëkundjet.
“Ne po monitorojmë rreziqet e tërmetit. Personeli ynë do të vendoset menjëherë në vendngjarje nëse ndikimet janë serioze. Deri më tani, nuk kemi raporte për dëme apo viktima,” tha Latief.
Indonezia ndodhet në një zonë të cenueshme ndaj tërmeteve të quajtur “Unaza e zjarrit e Paqësorit”.
