Papa Leo ka bërë thirrje për unitet dhe bashkëpunim ndërfetar, duke kërkuar dënimin e çdo forme të shfrytëzimit të emrit të Zotit për qëllime politike, ekonomike apo ushtarake.
Deklarata e tij u bë gjatë pritjes së një delegacioni të krerëve të bashkësisë myslimane të Senegalit, ku ai theksoi rëndësinë e vëllazërisë dhe përgjegjësisë së përbashkët në mbrojtje të paqes dhe dinjitetit njerëzor.
“Mbi themelet e vëllazërisë, në origjinën e njerëzimit dhe në besim, ne së bashku marrim përsipër përgjegjësinë tonë të përbashkët: të dënojmë çdo formë diskriminimi dhe persekutimi të bazuar në racë, fe ose origjinë; të hedhim poshtë çdo shfrytëzim të emrit të Zotit për qëllime ushtarake, ekonomike ose politike”, deklaroi Papa Leo.
Ai ngriti shqetësimin edhe për situatën në Afrikë, duke thënë se konfliktet e armatosura vazhdojnë të shkaktojnë pasoja të rënda në kontinent.
“Për fat të keq, konfliktet e armatosura vazhdojnë në kontinentin afrikan, ndërsa kësaj i shtohen edhe fjalimet e urrejtjes që helmojnë strukturën shoqërore”, tha ai.
Papa Leo theksoi se bota sot ka nevojë për diplomaci dhe dialog fetar të bazuar në paqe, drejtësi dhe të vërtetë.
