Presidenti i SHBA-së, Donald Trump tha se udhëheqësi i Koresë së Veriut Kim Jong-Un ishte një njeri shumë i hapur dhe shumë i ndershëm.
Trump tha se vendi i tij do të vazhdojë të ushtrojë presion maksimal ndaj Phenianit për të sjellë denuklearizimin e Gadishullit Korean, transmeton KosovaPress.
“Ata na thanë drejtpërdrejt se duan një takim sa më parë që të jetë e mundur. Mendojmë se është një gjë e mrekullueshme për botën”, tha Trump në një konferencë shtypi me presidentin francez Emmanuel Macron në Shtëpinë e Bardhë.
“Kim Jong-Un është vërtet i hapur dhe mendoj shumë i ndershëm, duke gjykuar nga gjithçka që kemi parë," tha Trump.
Ai përsëriti se do të "ngrihej nga tryeza" nëse negociatat e paralajmëruara me Kim nuk do të ishin produktive ose nëse Koreja e Veriut nuk do të vepronte në mirëbesim.
“Ne do të shohim se ku do të çojë e gjithë kjo. Mund të jetë e mrekullueshme, dhe ndoshta nuk do të ndodhë”, tha ai.
Presidenti amerikan deklaroi se "nuk do të përsërisë gabimet e administratës së mëparshme" dhe se SHBA do të vazhdojë të ushtrojë "presion maksimal" ndaj Koresë së Veriut.
“Dua të lirohen nga armët e tyre bërthamore”, u shpreh Trump.