Deshëm vetëm ta drogonim: nga mohimi kategorik që i bënë për ditë të tëra vdekjes së gazetarit kundërshtar të regjimit, sauditët e pranuan më pas se ai ka ndërruar jetë në duart e një ekipi agjentesh, ndërsa tani japin edhe detaje të reja.
Zyrtare sauditë pohojnë se plani fillestar ka qenë ta bindnin Kashogin të kthehej në vendlindje. Nëse do të refuzonte, hapi i ardhshëm do të ishte administrimi i një qetësuesi të fortë; pas kësaj, brenda 48 orësh do të duhej të dërgohej në një vend të sigurt në Stamboll.
Nëse edhe pas këtij presioni, opinionisti i Uashington post sërish nuk do ta pranonte të kthehej në Arabinë Saudite, atëherë një bashkëpunëtor lokal do ta linte të largohej. I njëjti burim pohon se një ekspert mjeko-ligjor ishte në ndërtesë me detyrën të fshinte çdo gjurmë të pranisë së Kashogit në konsullatë, në mënyrë që nëse ai do të ankohej më vonë e të thoshte se e kishin rrëmbyer, të mos ekzistonte asnjë provë.
“The New York Times”, sakaq raporton se eksperti në fjalë ka pasur me vetë një sharrë kockash. Donald Trump, më herët, e cilësoi vrasjen si përpjekjen më të keqe në histori për të mbuluar diçka.
Personat përgjegjës, u shpreh ai, tani duhet të jenë në telashe të mëdha. Kjo ishte kritika më e fortë publike deri më sot e Trump-it ndaj Arabisë Saudite në lidhje me çështjen, por Shefi i Shtëpisë së Bardhë sërish ka vazhduar ta theksojë rëndësinë e këtij vendi si aleat i ngushtë i Shteteve të Bashkuara.
