Ministri britanik udhëton drejt Iranit për të diskutuar paktin bërthamor

Bota

Ministri britanik udhëton drejt Iranit për të diskutuar paktin bërthamor

Më: 19 nëntor 2018 Në ora: 09:40
Ministri i Jashtëm britanik, Jeremy Hunt.

Sekretari i Jashtëm britanik, Jeremy Hunt pritet që më 19 nëntor të vizitojë për herë të parë Iranin, për të diskutuar rreth paktit bërthamor që ka nënshkruar Teherani me fuqitë botërore.

Vizita e Hunt në Iran shënon edhe udhëtimin e parë të një ministri të Jashtëm nga Perëndimi, prej kur Shtetet e Bashkuara janë tërhequr nga marrëveshja bërthamore, e cila parasheh heqje të sanksioneve ndaj Iranit, në këmbim të frenimit të aktivitetit bërthamor.

Në raportin e fundit të Vëzhguesit të Kombeve të Bashkuara për Armë Bërthamore, është thënë se Irani është duke vepruar në përputhje me paktin e vitit 2015, pavarësisht pse Uashingtoni është tërhequr nga ai dhe ka vendosur valën e dytë të sanksioneve ndaj Teheranit më 4 nëntor.

Para nisjes së vizitës në Iran, Hunt ka thënë në një deklaratë se marrëveshja bërthamore është “element i rëndësishëm për stabilitet në Lindje të Mesme” dhe se Britania “do ta zbatojë atë për aq kohë sa edhe Irani do ta bëjë një gjë të tillë”.

Zyra e ministrit britanik ka bërë të ditur se Hunt do të takohet me homologun e tij iranian, Mohammad Javad Zarif dhe do të diskutojë përpjekjet evropiane që heqja e sanksioneve ndaj këtij shteti të vazhdojë.

Mirpo edhe Hunt ka thënë se Irani duhet t’iu japë fund atyre që presidenti amerikan, Donald Trump i ka cilësuar si “aktivitete të dëmshme”, siç janë zhvillimi i raketave bërthamore dhe mbështetja për grupet militante në Lindje të Mesme.

“Ne duhet të shohim dhënien fund të aktivitetit destabilizues të Iranit në rajon, nëse kërkojmë që të luftojmë rrënjët e pasojave me të cilat përballet rajoni”, ka thënë Hunt në një deklaratë.

Presidenti amerikan, Donald Trump ka tërhequr SHBA-në nga ky pakt me arsyetimin se Irani ka shkelur “shpirtin dhe marrëveshjes” si dhe ka akuzuar po këtë shtet për aktivitete të dëmshme në rajon.

commentFirst article
Sot mund të lexoni Shfletoni kopertinat