Presidenti i Ukrainës, Petro Poroshenko, e ka nënshkruar një ligj që e shpall të përfunduar Traktatin e Miqësisë me Rusinë. Në një deklaratë të publikuar në faqen zyrtare të tij, Poroshenko tha se ligji është pjesë e strategjisë për t’u larguar plotësisht nga e kaluara koloniale dhe për t’u orientuar drejt Evropës.
Traktati do të jetë i pavlefshëm nga 31 marsi i vitit të ardhshëm, ndërsa deputetët ukrainasë kanë votuar që të mos vazhdohet afati i tij. I nënshkruar në vitin 1997, ky traktat e obligonte Rusinë dhe Ukrainën që ta respektojnë integritetin territorial të njëra-tjetrës dhe ta garantojnë ruajtjen e vijës së përbashkët kufitare.
Sipas marrëveshjes, kërkohej që Ukraina dhe Rusia duhet të ndërtojnë marrëdhënie dypalëshe duke u mbështetur në parimet e respektit të ndërsjellë ndaj barazisë, kufinjve dhe zgjidhjes paqësore të mospajtimeve, pa përdorur forcën dhe kërcënimet.
Ndonëse Rusia e kishte mohuar ndërhyrjen në punët e brendshme të Ukrainës, Gjykata Ndërkombëtare kishte deklaruar në vitin 2016 se luftimet në lindje të Ukrainës paraqesin konflikt të armatosur ndërkombëtar, shkruan “Free Europe”.
