25 persona janë arrestuar në Itali në kuadër të një operacioni kundër trafikimit ndërkombëtar të lëndëve narkotike, realizuar nga Ndranghetta, organizatë e tipit mafioz që vepron në zonë e Kalabrisë.
Sipas mediave italiane të gjithë të arrestuarit në qytete te ndryshme të Italisë, janë pjesëtarë të klanit “Mancusco”, një prej grupeve brenda Ndranghettas. Sipas mediave italiane, të cilat citojnë organet e sigurisë, organizata ishte në zgjerim e sipër dhe kjo e ka bërë edhe më të rëndësishëm bllokimin e saj.
Një rol vendimtar në këtë organizatë kishte edhe shqiptarja Elisabeta Kotja, e fejuara e Salvatore Constantinos, një prej pjesëtarëve të klanit “Mancusco”. Detyra e saj: të mbante lidhjet mes pjesëtarëve të bandës, për të ruajtur sa më tepër anonimatin. Edhe ajo figuron mes të arrestuarve, ndërsa pjesëtare të tjera femra të bandës kishin për detyrë që të mbanin lidhjet mes Kalabrisë dhe Kolumbisë.
Në raportin e Antimafias italiane thuhet se shqiptarja Elisabeta Kotja lindur në Shqipëri më 19.09.1979 konsiderohet si një ndërmjetëse e nivelit të lartë me eksponentët e kartelave të drogës në Amerikën Latine. Mes të arrestuarve janë dhe dy femra venezuelase të njohura në panoramën e trafikut ndërkombëtar të drogës; Garcia Rebolledo Clara Ines e Forgione Gina.
Një nga të arrestuarit është dhe kolumbiani Murillo Figueroa Julio Andres, një trafikant mjaft i njohur droge që në të shkuarën ka bashkëpunuar me superbosin e kokainës Pablo Escobar, kreu i kartelit Medellin në Kolumbi.
Hetimet prej dy vitesh të antimafias italiane kanë zbardhur një sipërmarrje të vërtetë krimi në trafikun e drogës në nivel ndërkombëtar.
Janë sekuestruar mbi 3000 kg hashash që ka mundur t’i sjell klaneve të Ndranghetas një përfitim prej 4-5 milionë euro që më pas investoheshin në trafikun e kokainës.
Për mbrojtjen e aktivitetit të tyre të drogës, përdornin dhe armët dokumentuar nga hetimet e antimafias të cilat kanë zbardhur rolin e italianit Cuçia Carlo, nga Kalabria, një aktor i dorës së dytë në serinë televizive Gomorra, me detyrën e gjetjes së armëve që viheshin në dispozicion të anëtarëve të këtij organizimi kriminal.
Bashkëpunimi në nivel ndërkombëtar me grupe trafikantësh nga Amerika e Jugut, Hollanda, Afrika e Veriut e Spanja, ka bërë që mafia kalabreze të shtrirë territorin e influencës së saj në trafikun e lëndëve narkotike në të gjithë Evropën duke rritur biznesin e fitimeve të cilat i investonte në sektorë të ndryshëm të ekonomisë.
