Një adoleshent shqiptar që kishte hyrë në Britaninë e Madhe fshehurazi në pjesën e pasme të një kamioni, rrezikon të dëbohet tani prej atje kur sapo ka mbushur 18 vjeç.
Shtypi anglez, Metro.co.uk i ka kushtuar një shkrim Sametit shqiptar, sot, ku tregon se jeta e tij në Shqipëri karakterizohej nga abuzimi dhe dhuna e tmerrshme. Që 11 vjeç atë e detyronin të lypte nëpër rrugë dhe në moshën 15 vjeç, u morr zvarrë nga babai i tij për në Bruksel, një nyjë famëkeqe ky për trafikun e njerëzve në zemër të Evropës.
Por djaloshi arriti t’ia mbathte nga kthetrat e të atit në Belgjikë dhe shijoi lirinë për të parën herë kur u gjend në një kamion në Bristol tre vjet më parë.
Pas gjashtë muajsh qëndrim në një shtëpi fëmijësh, shërbimet sociale e dërguan Sametit të jetonte me John Stokes, një kujdestar i besuar në zonë që kishte mbështetur afro 80 fëmijë me probleme dhe me shqetësime për 30 vjet.
Që kur mbërriti në Bristol në moshën 15 vjeç e mezi fliste anglisht, Sameti tani e ka ndryshuar jetën e tij është duke përmbushur ëndrrat për t’u bërë marangoz.
Mirëpo, sapo ai mbushi 18 vjeç muajin e kaluar, Home Office i dërgoi një letër që ia copëtoi ëndrrat, duke e njoftuar se kërkesa e tij për të qëndruar në Britani ishte refuzuar.
Sameti tani është i frikësuar për kthimin e tij në atdhe ku nuk ka asgjë për të kujtuar veç traumës.