Duke ditur gjendjen ekonomike në Kosovë, shqiptarët në Diasporë gjithmonë kanë shprehur ndjeshmërinë dhe gatishmërinë për t’u ardhur në ndihmë bashkëkombasve të tyre e më së shumti familjeve me kushte të rënda ekonomike.
E tillë ishte dhe nisma e Lobit Euro-Atlantik Shqiptar, Dega e Zvicrës e cila me mbledhjen e kontributeve nga anëtarë e dashamirës të saj, ju erdhi në ndihmë rreth 52 familjeve, duke ju ofruar ushqime, këto ditë të shenjta të Ramazanit, në prag të festës së Bajramit.
Kryetari i Degës së Zvicrës, z. Elias Mustafa dhe nënkryetari z. Sutki Hulaj ideuan këtë nismë dhe për rreth dy javë mundën të mbledhin një shumë modeste prej 3150 euro, shumë e cila u përdor për blerjen e ushqimeve.
Ditën e Premte, më dt 22-05-2020, nënkryetari i degës së Zvicrës, njëkohësisht dhe zëdhënës shtypi i Lobit Euro-Atlantik Shqiptar, z.Sutki Hulaj, i shoqëruar nga aktivistë e donatorë, ka kryer shpërndarjen në komunat e Deçanit, Pejës, Junikut dhe Istogut.
Aktiviteti human u përcoll dhe prej Radio-Televizionit (RTK).
Lobi Euro-Atlantik Shqiptar (LEASH) përgëzon degën e Zvicrës, falenderon të gjithë anëtarët e dashamirësit e LEASH për gatishmërinë dhe kontributin e tyre!
LEASH do të jetë gjithmonë organizatore e nismave të tilla dhe përkrahëse e aktiviteteve të ngjashme.
Zyra e Shtypit LEASH