Vdekja e Florenc Beqirajt, reagon për herë të parë Ambasada e Shqipërisë në Francë

Diaspora

Vdekja e Florenc Beqirajt, reagon për herë të parë Ambasada e Shqipërisë në Francë

Më: 23 dhjetor 2017 Në ora: 06:30
Florenc Beqiraj

Ambasada e Shqipërisë në Francë ka reaguar për herë të parë për vdekjen tragjike të 23 vjeçarit Florenc Beqiraj në spital në Francë, pas dyshimeve se ai është dhunuar në burgun e Marsejës.

Përmes një reagimi zyrtar, Ambasada shqiptare në Francë shpreh ngushëllimet familjes për humbjen e rëndë.

Ndërsa thekson se ka ndjekur me vëmendje rastin dhe hetimet e policisë, duke nënvizuar se deri më tani dyshohet se i riu ka kryer vetëvrasje.

Reagimi i plotë:

Njoftim lidhur me rastin e zotit Florenc Beqiraj

Duke u nisur edhe nga interesimi i veçantë mbi rastin e shtetasit zotit Florenc Beqiraj, i cili ndodhej prej disa ditësh në gjendje kritike në spitalin Nord të Marsejës (Francë), Ambasada e Shqipërisë në Francë njofton me hidhërim të thellë se, sot pasdreke, ai është deklaruar i vdekur nga autoritetet spitalore franceze. Për këtë gjë, janë njoftuar familjarët e të ndjerit, përfaqësuesit ligjorë të familjes, dhe Ambasada.

Ambasada e Shqipërisë, e cila që prej njoftimit të ditës së parë e ka ndjekur nga afër rastin e të ndjerit Beqiraj, në kontakt me autoritetet policore dhe gjyqësore-hetimore dhe me ato mjekësore-spitalore të qytetit të Marsejës, si edhe me të afërmit e tij, i shpreh familjes dhe të afërmve të të ndjerit për këtë humbje të të dashurit të tyre, ngushëllimet e saj të sinqerta, si edhe ato të Ministrisë për Evropën dhe Punët e Jashtme.

Duke vazhduar ta ndjekë nga afër çështjen si me autoritetet policore dhe gjyqësore franceze, në pritje të përfundimit të hetimit zyrtar lidhur me rrethanat e vdekjes së të ndjerit Florenc Beqiraj, ashtu edhe me përfaqësuesit ligjorë të familjes, Ministria për Evropën dhe Punët e Jashtme dhe Ambasada e Shqipërisë janë të angazhuara maksimalisht për të qenë pranë të afërmve dhe për kryerjen e lehtësimin e të gjitha procedurave të parashikuara në këto raste sipas ligjit. Ajo risjell gjithashtu në vëmendje se mbrojtja e interesave të Shqipërisë dhe qytetarëve të saj jashtë Shqipërisë është prioritet kryesor i veprimtarisë së qeverisë, e më posaçërisht i Ministrisë për Evropën dhe Punët e Jashtme dhe i përfaqësive të saj në botë.

Sot mund të lexoni Shfletoni kopertinat