Edhe dy persona të tjerë kanë përfunduar në prangat e policisë australiane pas vrasjes së një 45 vjeçari shqiptar në periferinë veri-lindore të Adelaide.
Viktima është identifikuar si Urim Gjabri.
Policia bastisi një banesë në Murray Bridge, duke arrestuar një 23 vjeçar i quajtur Matt Tenhoopen dhe 20-vjeçaren Bridie McCormack.
Policia thotë se të dy të akuzuarit janë pjesë e një bande të përfshirë në sulmin tronditës ndaj burrit me origjinë shqiptare Urim Gjabri.
45 vjeçari u gjet i vdekur brenda shtëpisë së tij në orët e hershme të 12 tetorit, tri ditë pasi ishte vrarë.
Tenhoopen akuzohet për vrasje, për krime të rënda dhe vjedhje, ndërsa vajza akuzohet për ndihmë ndaj autorit dhe trafikimin e kanabisit.
Këto arrestime pasojnë arrestimin e mëhershëm të 35 vjeçarit Aaron Carver, i akuzuar më parë për vrasjen e Gjabrit këtë javë.
Burri u arrestua në Queensland gjatë fundjavës pasi u zbuluan gjurmë të ADN-së së tij në një filtër cigareje në vendngjarje.
Policia thotë se do të ketë të tjera arrestime, pasi hetimet për vrasjen janë në zhvillim e sipër.
